မကွေးတိုင်း၊ မြိုင်မြို့နယ်မှာ မတ်လ ၂၈ ရက်နေ့ မွန်းတည့်ပိုင်းက ညနေအထိ တိုက်ပွဲတွေ ဖြစ်ပွားခဲ့ပြီး စစ်ကောင်စီတပ်သားနဲ့ရဲ ၉ ယောက်သေဆုံးခဲ့တယ်လို့ MVRF တပ်ဖွဲ့ကနေ သိရပါတယ်။

မြိုင်မြို့နယ် ဗဟင်းရဲစခန်းကို မတ် ၂၈ ရက် မွန်းတည့် ၁၂ နာရီလောက်ကနေ ညနေ ၄ နာရီလောက်အထိ ဒေသကာကွယ်ရေး ညီနောင်မဟာမိတ်တွေပူးပေါင်းပြီး စခန်းသိမ်းတိုက်ပွဲ ဆင်နွှဲနေတဲ့အချိန် စစ်ကောင်စီဘက်က ဂျက်ဖိုက်တာတစီးနဲ့ လေကြောင်းကနေ ဆက်တိုက်ပစ်ခတ်လို့ ပြန်လည်ဆုတ်ခွာခဲ့ရတယ်လို့ MVRF တပ်ဖွဲ့ရဲ့ ခေါင်းဆောင် ဦးအောင်ဇေယျက ဒီဗွီဘီကိုပြောပါတယ်။

“နှစ်ဖက်တိုက်ပွဲအတွင်းမှာ စစ်ကောင်စီဘက်က ၉ ယောက်လောက်သေဆုံးပြီး ကျနော်တို့ ညီနောင်မဟာမိတ်တပ်ဖွဲ ဘက်က ရဲဘော် ၂ ယောက် ဒဏ်ရာအနည်းငယ်ရရှိခဲ့ပြီး ဒဏ်ရာအခြေနေ မစိုးရိမ်ရဘူး။”  

အဲဒီတိုက်ပွဲကို မြိုင်မြို့နယ်ကျေးရွာများ တော်လှန်ရေးတပ်ဦး MVRF၊ PRA၊ ကျားသစ်နက်ပြောက်ကျားတပ်ဖွဲ့၊ ပုလဲ(ပ.က.ဖ)၊ PPDGနဲ့ Tiger အဖွဲ့တို့က ပူးပေါင်တိုက်ခိုက်ခဲ့တာဖြစ်ပြီး စစ်ကောင်စီက လေကြောင်းကနေ တိုက်ခိုက်တာကြောင့် စခန်းမသိမ်းနိုင်ခဲ့ဘူးလို့ ပြောပါတယ်။

ဗဟင်းရဲစခန်းကို ၂၀၂၁ ခုနှစ် ဒီဇင်ဘာလ ၂ ရက်နေ့မှာလည်း မြိုင် PDF က ဝင်ရောက်တိုက်ခိုက်ခဲ့လို့ ရဲ ၂ ယောက်သေဆုံးကာ အများအပြား ဒဏ်ရာရရှိခဲ့တယ်လို့ သိရပါတယ်။

နှစ်ဖက်တိုက်ပွဲတွေနဲ့ ပတ်သက်လို့တော့ ထိခိုက်သေဆုံးတဲ့ အခြေနေကိုတော့ စစ်ကောင်စီဘက်က သတင်းထုတ်ပြန်ထားတာမတွေ့ရသေးပါဘူး။