မကွေးတိုင်း၊ ရေစကြိုမြို့က ကံပွင့် ပလတ်စတစ်စက်ရုံ ဖောက်ခွဲမီးရှို့ခဲ့သူ ၅ ယောက်ကို ရေစကြို PDF က မတ် ၃၀ ရက်နေ့မှာ ဖမ်းဆီးစစ်ဆေးနေတယ်လို့ ရေစကြို PDF က ပြောပါတယ်။

ရေစကြိုမြို့ ပေကုန်းတိုးချဲ့ရပ်ကွက်က ကံပွင့်ရဲ့ လုပ်ငန်းစုတခုဖြစ်တဲ့ ပလတ်စတစ်စက်ရုံကို မနေ့ မွန်းလွဲ ၂ နာရီလောက်မှာ လက်နက်ကိုင်အဖွဲ့တဖွဲ့က ကားနဲ့လာရောက်ပြီး ဖောက်ခွဲမီးရှို့ကာ မန်နေဂျာကိုပါ ဖမ်းဆီးသွားတာလို့ ရေစကြို PDF ခေါင်းဆောင် ရဲဘော်ဝေကြီးက ဒီဗွီဘီကို ပြောပါတယ်။

"ကံပွင့်စက်ရုံကို ဖောက်ခွဲမီးရှို့ခဲ့တာဟာ ရေစကြို PDF က မဟုတ်ဘဲ ရွာနီးချုပ်စပ်တွေမှာ ဓားပြတိုက်နေတဲ့ အဖွဲ့တဖွဲ့ဖြစ်တယ်။ အခု သူတို့ကို ဖမ်းမိထားပြီး စစ်ဆေးတာတွေ ပြုလုပ်နေတယ်။ ကျနော်တို့ PDF အဖွဲ့က လိုက်လံဖမ်းဆီးတော့ မီးရှို့ဖောက်ခွဲသွားတဲ့ ၅ ယောက်နဲ့ မန်နေဂျာကို ဖမ်းမိထားပြီဗျ။ ကနဦး စစ်ဆေးချက်တွေအရတော့ အဲဒီနားက ရွာနီးနားတွေမှာ ဓားပြတိုက်တဲ့ အမှုတွေ စစ်ဆေးပေါ်ပေါက်ထားတယ်။ အသေးစိတ် အချက်လက်တွေကိုတော့ နောက်ပိုင်းမှာ ထုတ်ပြန်ပေးသွားမယ်။"

ကံပွင့်စက်ရုံပိုင်ရှင်ဟာ စစ်ကောင်စီနဲ့ ပျူစောထီးတွေကို ထောက်ပံ့တာကြောင့် PDF အဖွဲ့က မီးရှို့ဖောက်ခွဲသွားတယ်လို့ သတင်းတွေ ပျံ့နှံနေပေမယ့် ရေစကြို PDF က သူတို့လက်ချက် လုံးဝမဟုတ်ဘဲ ကျူးလွန်တဲ့သူတွေကို ဖမ်းဆီးစစ်ဆေးနေတယ်လို့ သိရပါတယ်။