နိုင်ငံတော်ရဲ့အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဟာ ဒီကနေ့ မတ်လ ၃၁ ရက်နေ့ ရုံးချိန်းကို လာရောက်ခဲ့တယ်လို့ တရားရုံးနဲ့နီးစပ်တဲ့အသိုင်းအဝိုင်းကနေ စုံစမ်းသိရပါတယ်။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဟာ သူနဲ့အတူနေသူတွေ ကိုဗစ်ရောဂါ ကူးစက်ခံထားရတာကြောင့် ပြီးခဲ့တဲ့ ရက်ပိုင်းက ကွာရန်တင်း၀င်နေရတဲ့အတွက် တရားရုံးကို မလာရောက်နိုင်ဘဲ ဒီနေ့မှ ရောက်လာတာဖြစ်ပါတယ်။ 

ဒီနေ့မှာတော့ သြစတြေးလျနိုင်ငံသား စီးပွားရေးပညာရှင် ရှောင်တာနယ်လ်ကို စွဲဆိုထားတဲ့ မြန်မာနိုင်ငံအစိုးရလျှို့ဝှက်ချက်များ အက်ဥပဒေပုဒ်မ ၃-၁ (ဂ)ကို ဒီကနေ့ ဇမ္ဗူသီရိအထူးတရားရုံးမှာ ရုံးထုတ်စစ်ဆေးခဲ့ပြီး အမှုတွဲပါ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ရုံးချိန်းကို လာရောက်ခဲ့တာဖြစ်တယ်လို့ တရားရုံးနဲ့နီးစပ်သူက ပြောပါတယ်။

ဒီအမှုမှာ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပြင် ဦးစိုးဝင်း(စီမံ/ ဘဏ္ဍာဝန်ကြီး)၊ ဦးဆက်အောင်(စီမံ/ဘဏ္ဍာ/စက်မှု ဒုဝန်ကြီး)နဲ့ ဦးကျော်ဝင်း(စီမံ/ဘဏ္ဍာဝန်ကြီးဟောင်း)တို့လည်း အမှုတွဲအဖြစ် တရားစွဲခံထားရတာ ဖြစ်ပါတယ်။

မနက်ဖြန် ဧပြီ ၁ ရက်မှာတော့ ၂၀၂၀ ရွေးကောက်ပွဲမှာ နိုင်ငံတော်သမ္မတ ဦး၀င်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ ပြည်ထောင်စုအစိုးရအဖွဲ့ရုံး၀န်ကြီးဌာန ပြည်ထောင်စု၀န်ကြီး ဦးမင်းသူတို့က ပြည်ထောင်စုရွေးကောက်ပွဲကော်မရှင်အပေါ်မှာ မလျော်သြဇာလွှမ်းမိုးခဲ့တဲ့ စွပ်စွဲချက်နဲ့ တရားစွဲထားတဲ့ ရာဇသတ်ကြီးပုဒ်မ ၁၃၀-က အမှုကို ရုံးထုတ်စစ်ဆေးမှာ ဖြစ်ပါတယ်။