ဘရာဇီးနိုင်ငံ မြို့တော် ဘရပ်စီးလီးယားမှာ တိုင်းရင်းသား ရာချီဟာ သမ္မတ ယဲ ဘိုစိုနာရိုရဲ့ ဥပဒေကို ဆန့်ကျင်ပြီး မြေယာပိုင်ဆိုင်ခွင့်ကို ခုခံကာကွယ်ဖို့ ဧပြီ ၆ ရက်က လမ်းပေါ်ထွက် ဆန္ဒပြခဲ့ကြပါတယ်။

ဒါဟာ ဧပြီ ၄ ရက်က စတင်ခဲ့တဲ့ ၁၀ ရက်ကြာ သပိတ်စခန်းရဲ့ အစိတ်အပိုင်းလည်း ဖြစ်ပါတယ်။

“အနာဂတ်ဟာ တိုင်းရင်းသား၊ ဘိုစိုနာရို ထွက်သွား” လို့ ရေးထားတဲ့ ဆိုင်းဘုတ်တွေနဲ့ ကမ္ဘာကြီးကို ကိုယ်စားပြုတဲ့ အကြီးစား ဘောလုံးတွေကို သယ်ဆောင်ရင်း ဆန္ဒပြသူတွေဟာ ဘရပ်စီးလီးယား မြို့တော်က အမျိုးသားလွှတ်တော် အပြင်ဘက်ဆီ ချီတက်ခဲ့ကြပါတယ်။

သမ္မတက အဆိုတင်တဲ့ ဥပဒေမူကြမ်းအတွက် အောက်လွှတ်တော်ကို ဖိအားပေးဖို့ သပိတ်စခန်းကို တည်ခဲ့ကြတာပါ။

တိုင်းရင်းသားတွေရဲ့ ဘိုးဘွားပိုင်မြေပေါ်မှာ သတ္တုနဲ့ ရေနံရှာဖို့၊ ကာကွယ်ထားတဲ့မြေတွေကို စီးပွားဖြစ် သတ္တုတူးဖို့နဲ့ စိုက်ပျိုးရေးအတွက် ခွင့်ပြုမယ့် ဥပဒေမူကြမ်းကို သမ္မတက လွှတ်တော်မှာ အဆိုတင်ခဲ့ပါတယ်။ ဒါကြောင့် ဆန္ဒပြပွဲမှာ တိုင်းရင်းသူတွေက ဘိုစိုနာရိုကို အစုလိုက် လူသတ်သမား၊ ထွက်သွားလို့ အော်ဟစ် ကြွေးကြော်ခဲ့ကြပါတယ်။

ဘိုစိုနာရိုကတော့ တိုင်းရင်းသားတွေမှာ မြေတွေအများကြီး ရှိပြီးသားမို့ တိုင်းပြည်တိုးတက်ရေး နှောင့်နှေးနေတယ်၊ ဌာနေတိုင်းရင်းသားတွေအတွက် သီးသန့်မြေတွေကို နောက်ထပ် တလက်မမှ ထပ်ပြီး အသိအမှတ် မပြုတော့ဘူးလို့ ကတိပြုခဲ့ပါတယ်။

သဘာဝပတ်ဝန်းကျင် ပညာရှင်တွေကတော့ ဌာနေတိုင်းရင်းသားတွေအတွက် သီးသန့် မြေတွေဟာ မိုးသစ်တောတွေ ထပ်ပြီး ဖျက်ဆီးမခံရအောင် ကာကွယ်ပေးထားတယ်လို့ ပြောခဲ့ပါတယ်။