အမေရိကန်ဦးဆောင်တဲ့ အနောက်နိုင်ငံတွေက ယူကရိန်းကို လက်နက်နဲ့ ခဲယမ်းမီးကျောက်တွေ ဆက်ပြီး ပံ့ပိုးနေမယ်ဆိုရင် အမေရိကန်နဲ့ တိုက်ရိုက် ထိပ်တိုက်ရင်ဆိုင်သင့်တယ်လို့ ရုရှားက သတိ ပေးလိုက်ပါတယ်။ 

အမေရိကန်နိုင်ငံဆိုင်ရာ ရုရှားသံအမတ်ကြီး အနာတိုလီ အန်တိုနော့ဗ်က နယူးယောက်မြို့ အခြေစိုက် နယူးဝိခ်သတင်းဌာနနဲ့ လူတွေ့မေးမြန်းခန်းမှာ ဧပြီ၉ ရက်နေ့က မှတ်ချက်ပြု ပြောဆိုလိုက်တာပါ။

ယူကရိန်းဟာ အခုတော့ အနောက်နိုင်ငံတွေက ထုတ်လုပ်ထားတဲ့ လက်နက်တွေကို ကိုင်ဆောင်ထားပြီလို့လည်း ရုရှားက ပြောပါတယ်။

အန်တိုနော့ဗ်က ခုလိုမပြောခင်မှာ ဗြိတိန်ဝန်ကြီးချုပ် ဘောရစ်ဂျွန်ဆင်က ယူကရိန်းကို စီးပွားရေးနဲ့ စစ်ရေးအထောက်အပံ့တွေပိုပေးဖို့ ဧပြီ ၉ ရက်နေ့က ကတိပြုခဲ့ပါတယ်။

ဂျာမန်ကာကွယ်ရေးဝန်ကြီးကတော့ ဂျာမနီဟာ ယူကရိန်းကို သူ့စစ်တပ် အရန်လက်နက်တိုက်က လက်နက်တွေ ပံ့ပိုးနိုင်စွမ်း ကုန်ခါနီးပြီလို့ ပြောပါတယ်။

လက်နက်လုပ်ငန်းတွေကနေ တိုက်ရိုက်ပံ့ပိုးဖို့ကတော့ ဖြစ်နိုင်တယ်လို့လည်း သူက ပြောခဲ့ပါတယ်။

မြောက်အတ္တလန္တိတ် စစ်ရေးမဟာမိတ်အဖွဲ့ နေတိုးက အဖွဲ့ဝင်နိုင်ငံတွေရဲ့ နိုင်ငံခြားရေး ဝန်ကြီးတွေကလည်း ယူကရိန်းကို စစ်ရေးပံ့ပိုးတာ ပိုတိုးဖို့ ဘရပ်ဆဲလ်မြို့မှာ ပြီးခဲ့တဲ့အပတ်က အစည်းအဝေး ကျင်းပခဲ့ပါတယ်။

အမေရိကန်နိုင်ငံခြားရေး ဝန်ကြီး အန်ထော်နီ ဘလင်ကန်ကတော့ အမေရိကန်ဟာ ယူကရိန်းဆီ လုံခြုံရေး အထောက်အပံ့ အမေရိကန်ဒေါ်လာ သန်း ၁၀၀ ထပ်ပေးမယ်လို့ ပြောခဲ့ပါတယ်။

ရုရှားဟာ ဧပြီ ၉ ရက်နေ့က လေကြောင်း တိုက်ခိုက်ရေးအတွင်း ကွပ်ကဲရေးနဲ့ ဆက်သွယ်ရေးစခန်း လေးခု၊ လက်နက်တိုက်တွေ၊ လက်နက် သိုလှောင်ရုံ ၄၁ ခုတို့ အပါအဝင် ယူကရိန်းစစ်တပ်ရဲ့ ပံ့ပိုးမှု အင်္ဂါရပ် ၆၅ ခုကို ဖျက်ဆီးခဲ့ပြီးပြီလို့ ရုရှားကာကွယ်ရေးဝန်ကြီးဌာနက ပြောပါတယ်။

ပြည်ပ ဒဏ်ခတ်မှုတွေကို ရင်ဆိုင်ရင်း စီးပွားရေး တည်ငြိမ်တာ သေချာစေဖို့ အမေရိကန်ဒေါ်လာ ၃.၄ ဘီလျံနဲ့ ညီမျှတဲ့ ငွေတွေကို အရန်ရန်ပုံငွေအဖြစ် တိုးသုံးလိုက်ပြီလို့ ရုရှားအစိုးရက ဧပြီ ၁၀ ရက်နေ့မှာ ပြောပါတယ်။

အဲဒီငွေပမာဏထဲက အများစုဟာ ၂၀၂၂ ခုနှစ် ပထမ ၃ လပတ်အတွင်း ရေနံနဲ့ဓာတ်ငွေ့ ကဏ္ဍကနေ ပြန်ရငွေတွေ ဖြစ်တယ်လို့လည်း အစိုးရက ကြေညာချက် ထုတ်ပြန်ပါတယ်။