ကယား(ကရင်နီ) ရိုးရာ တံခွန်တိုင်ပွဲတော်ကို ဩစတြေးလျနိုင်ငံ မယ်ဘုန်းမြို့အနီးက ဂျီလောင်းမြို့မှာ ဒီနေ့ကျင်းပပါတယ်။ 

တံခွန်တိုင်ပွဲတော်ဟာ ကယားပြည်နယ် (ကရင်နီပြည်နယ်) ထဲမှာ အဓိက နေထိုင်ကြတဲ့ ကယားအမျိုးသားတွေ ဘိုးစဉ်ဘောင်ဆက်ထိန်းသိမ်းလာတဲ့ ရိုးရာယုံကြည်မှု ပွဲတော်တခုဖြစ်ပါတယ်။ 

စိုက်ပျိုးရာသီအစမှာ  ကောက်ပဲသီးနှံတွေ  အောင်မြင်ဖြစ်ထွန်းဖို့ ရိုးရာ ရေသခင် မြေသခင်ကို ပူဇော်တဲ့ ဓလေ့တခုဖြစ်တယ်လို့ အခမ်းအနားကို နှစ်စဉ်ကျင်းပလာတဲ့  စတီးနိုမိုးဒူက ပြောပါတယ်။

ဒီနှစ်မှာတော့ ကရင်နီပြည်နယ်ထဲမှာ တိုက်ပွဲကြောင့် အိုးအိမ်တွေ  ဘုရားကျောင်းပျက်စီးပြီး သီးနှံစိုက်ပျိုးနိုင်ခြင်းမရှိတဲ့ စစ်ဘေးသင့် ပြည်သူတွေအတွက်လည်း ဆုတောင်းပေးခဲ့တယ်လို့ ရိုးရာအခမ်းအနား ဦးဆောင်ကျင်းပသူတွေက ပြောပါတယ်။ 

ဂျီလောင်းမြို့မှာ ကယားအမျိုးသားတွေ တံခွန်တိုင်ပွဲတော်ကို နှစ်စဉ်ကျင်းလာတာ ဒီနှစ် ၁၂ ကြိမ်မြောက်လို့ သိရပါတယ်။