တနင်္သာရီတိုင်း ရေဖြူမြို့နယ် ကလိန်အောင်မြို့၊ ရာဖူးကျေးရွာ အလယ်ရှိ ရေကစားမဏ္ဍပ်မှာ ဧပြီ ၁၅ ရက် သင်္ကြန်အကြတ်နေ့ မွန်းလွဲပိုင်းက ရေကစားနေသူအချို့အား ရေးမြို့ဘက်ကလာတဲ့ မှန်လုံယာဉ်တစီးက တိုက်မိတာကြောင့် ၄  ဦး အခင်းဖြစ်နေရာမှာ သေဆုံးခဲ့တယ်လို့ ဒေသခံတွေက ပြောပါတယ်။ 

သေဆုံးသူတွေကတော့ အသက် သုံးဆယ်၊ လေးဆယ်ဝန်းကျင် အမျိုးသား ၂ ဦး နဲ့ အသက် ၈ နှစ်အရွယ် ယောကျ်ားလေး  ၂ ဦး တို့ ဖြစ်ပါတယ်။

သေဆုံးသူတွေရဲ့ ရုပ်အလောင်းတွေကိုတော့ ကံပေါက်တိုက်နယ်ဆေးရုံနဲ့ ကလိန်အောင်ပြည်သူ့ဆေးရုံတွေကို သယ်ယူစစ်ဆေးခဲ့ပြီးနောက် ဧပြီ ၁၆ ရက်မှာပဲ စျာပနပြုလုပ်ခဲ့တယ်လို့ သိရပါတယ်။

ဒေသခံတဦးက “သူတို့က ဟိုင်းဝေးလမ်းမပေါ်အဖွဲ့လိုက်ရေကစားနေကြတာ၊ မှန်လုံလာတော့ ရှောင်လို့မမီဘဲ အခုလိုဖြစ်ကုန်တာ၊ ဒဏ်ရာရတဲ့ ကလေးတွေလည်းရှိသေးတယ်” လို့ ပြောပါတယ်။

မှန်လုံယာဉ်မောင်းကိုတော့ မှန်လုံယာဉ်နဲ့အတူ ကလိန်အောင်ရဲစခန်းမှာ ထိန်းသိမ်းထားကြောင်း မြို့ခံတွေက ပြောပါတယ်။

ရာဖူးကျေးရွာဟာ ရေး-ထားဝယ် ကာလမ်းမပေါ် တည်ရှိတဲ့ ကျေးရွာတရွာဖြစ်ပါတယ်။