မန္တလေးမြို့၊ ချမ်းအေးသာစံမြို့နယ်၊ မြို့ပတ်လမ်းနဲ့ ၃၄ လမ်းထိပ်ရှိ အန်အယ်လ်ဒီပါတီ မြို့နယ်ရုံးရှေ့မှာ ဧပြီ ၂၅ ရက် မနက်ပိုင်းက စိန်ဝင်းဝင်း လက်ဖက်ရည်ဆိုင်ပိုင်ရှင် သေဆုံးလျက်တွေ့ရှိပြီး  ဇနီးဖြစ်သူတော့ စိုးရိမ်ဒဏ်ရာတွေ့နဲ့ တွေ့ရှိခဲ့တယ်လို့ ဒေသခံ မျက်မြင်တချို့က ပြောပါတယ်။

စိန်ဝင်းဝင်းလက်ဖက်ရည်ဆိုင်ပိုင်ရှင် ဦးခင်မောင်သိန်းနဲ့ ဇနီးဖြစ်သူ ဒေါ်ခ တို့အပါအဝင် ၃ ဦးကို စစ်အုပ်စုက ဧပြီ ၂၄ ရက် ညပိုင်းက ဖမ်းဆီးခေါ်ဆောင်သွားပြီးနောက် အခုလို တွေ့ရှိခဲ့တာလို့ လက်ဖက်ရည်ဆိုင်ပိုင်ရှင်မိသားစုနဲ့ နီးစပ်သူ တဦးက ပြောပါတယ်။

“မနေ့က ဖမ်းခံရပြီး ဒီနေ့ အသတ်ခံရတယ်။ ပြီးတော့ လမ်းဘေး ပစ်သွားတယ်။ ဒေါ်ခလည်း သေပြီဆိုပြီး ပြောနေကြတယ်။ အတိအကျတော့ မသိရသေးဘူး။” 

စိန်ဝင်းဝင်းလက်ဖက်ရည်ဆိုင်ပိုင်ရှင် ဦးခင်မောင်သိန်းမှာ ထိုးသွင်းဒဏ်ရာ တချက်၊ ဦးခေါင်းနောက်စေ့ သေနတ်ဒဏ်ရာ တချက်တို့နဲ့ သေဆုံးနေပြီး  လည်ပင်းမှာ အနီရောင်သွေးသောက်အဖွဲ့ တံဆိပ်ပါ လည်ဆွဲကတ် ချိတ်ဆွဲထားတယ်လို့ သိရပါတယ်။

ဒေါ်ခ မှာလည်း စိုးရိမ်ရတဲ့ ဒဏ်ရာတွေနဲ့ လည်ပင်းမှာတော့ အလားတူ အနီရောင် သွေးသောက် အဖွဲ့တံဆိပ်ပါလည်ဆွဲကတ် ချိတ်ဆွဲထားတယ်လို့ ဆိုပါတယ်။

ဒါ့အပြင် ဧပြီ ၂၄ ရက် ညပိုင်းကလည်း ကမ်းနားလမ်း နှင်းဆီနဲ့ စံပယ်အိမ်ရာနားမှု သွေးသောက်အဖွဲ့ အနီရောင်စစ်‌ဆင်ရေး MDY စာသားပါ ကတ်ကို ချိတ်ဆွဲထားတဲ့ အမည်မသိ အမျိုးသား ရုပ်အလောင်းတခု တွေ့ရှိခဲ့ရပါတယ်။