ဂျပန်ဝန်ကြီးချုပ် ဖူမီယို ကီရှီနာဟာ ဧပြီ ၂၉ ရက်နေ့က အရှေ့တောင်အာရှဒေသ ခရီးစဉ်ရဲ့ ပထမဆုံး ခရီးတထောက်အဖြစ် အင်ဒိုနီးရှားနိုင်ငံကို ရောက်ရှိသွားပြီး သမ္မတ ဂျိုကိုဝီဒိုဒိုနဲ့ တွေ့ဆုံပါတယ်။

ဒီခရီးစဉ်ဟာ ယူကရိန်း အကျပ်အတည်း၊ ဒေသထဲမှာ တရုတ်ရဲ့ ခြေလှမ်းတွေကို ဘယ်လို တုံ့ပြန်မလဲဆိုတာတွေကို ဆွေးနွေးဖို့ ရည်ရွယ်ပါတယ်။ 

G7 အင်အားကြီး နိုင်ငံထဲမှာ ပါဝင်နေတဲ့ အာရှနိုင်ငံဖြစ်တဲ့ ဂျပန်ဟာ ရုရှားက ယူကရိန်းနိုင်ငံကို ကျူးကျော်တိုက်ခိုက်နေတဲ့ ကိစ္စကို အရှေ့တောင်အာရှနိုင်ငံတွေဘက်က တညီတညွတ်တည်း တုံ့ပြန်တာမျိုးကို ဖြစ်စေချင်နေတာပါ။ 

အာဆီယံထဲက စင်ကာပူကတော့ ရုရှားရဲ့ကျူးကျော်စစ်ကို အစကတည်းက တရားဝင် ကန့်ကွက်သလို၊ ရုရှားအပေါ် ဒဏ်ခတ်ပိတ်ဆို့မှုတွေလည်း ချမှတ်ထားပြီး ဖြစ်တယ်လို့ အစိုးရ အရာရှိတွေက ပြောပါတယ်။

ဒီအတောအတွင်း G20 အဖွဲ့ဝင်နိုင်ငံဖြစ်တဲ့ အင်ဒိုနီးရှားကလည်း ရုရှားက ယူကရိန်းကို တိုက်ခိုက်နေတာကို ရပ်တန့်ဖို့ တောင်းဆိုထားပါတယ်။

G20 အလှည့်ကျ ဥက္ကဋ္ဌဖြစ်တဲ့ သမ္မတ ဂျိုကိုဝီဒိုဒိုက နိုဝင်ဘာမှာ ကျင်းပဖို့ရှိတဲ့ အဖွဲ့ရဲ့ ထိပ်သီး အစည်းအဝေးကို တက်ရောက်ဖို့ ယူကရိန်းနဲ့ ရုရှားခေါင်းဆောင်တွေကို ဖိတ်ကြားခဲ့တယ်လို့ ပြောပါတယ်။

ဂျပန်ဝန်ကြီးချုပ်နဲ့ အင်ဒိုနီးရှား သမ္မတတို့ တွေ့ဆုံစဉ်မှာ ဒေသတွင်း တရုတ်ရဲ့ ခြေလှမ်းကျဲ နေတာတွေနဲ့ အင်ဒိုနီးရှားမှာ ဂျပန်က ရင်းနှီးမြှုပ်နှံဖို့ ကိစ္စတွေအပါအဝင် ကျယ်ကျယ်ပြန့်ပြန့် ဆွေးနွေးကြတယ်လို့ ရိုက်တာသတင်းက ဆိုပါတယ်။ 

ဂျပန်ဟာ ရှေ့လထဲမှာ ကွတ် "Quad"  လို့ခေါ်တဲ့ ဒေသတွင်း လုံခြုံရေးအဖွဲ့ အစည်းအဝေးကို လက်ခံ ကျင်းပဖို့ရှိပြီး အမေရိကန် သမ္မတဂျိုးဘိုင်ဒင်နဲ့ သြစတြေးလျ၊ အိန္ဒိယက ခေါင်းဆောင်တွေ တက်ရောက်ကြဖို့လည်း ရှိပါတယ်။ 

ဂျပန်ဝန်ကြီးချုပ်ဟာ အင်ဒိုနီးရှားကတဆင့် ဗီယက်နမ်၊ ထိုင်းတို့ကိုလည်း သွားရောက်မှာ ဖြစ်ပြီး တဆက်တည်း ဥရောပကို ခရီးဆက်ဖို့ ရှိပါတယ်။