မြန်မာ့ဖက်ဒရယ်ဒီမိုကရေစီအောင်နိုင်ရေးအဖွဲ့ပေါင်းချုပ် MFDMC အဖွဲ့ရဲ့ ထောက်ပံ့တပ်သားသစ်တွေ ကြိုဆိုခြင်းနဲ့ နွေဦးတော်လှန်ရေးတိုက်ပွဲမှာ ကျဆုံးခဲ့တဲ့ ရဲဘော်တွေကို ဂုဏ်ပြု အလေးပြုမယ့်အခမ်းအနားကို မေလ ၁ ရက် တနင်္ဂနွေ မနက်  ၁၀ နာရီမှာ အင်ချွန်းမြို့မှာရှိတဲ့ ဘူဖြောင်းအဝိုင်းမှာ ကျင်းပဖို့ရှိပါတယ်။

အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီးဌာန အသိအမှတ်ပြု ပြည်ပထောက်ပံ့ ရေးတပ်ဖွဲ့တဖွဲ့ဖြစ်တဲ့  မြန်မာ့ဖက်ဒရယ်ဒီမိုကရေစီအောင်နိုင်ရေးအဖွဲ့ပေါင်းချုပ် MFDMC - Korea အဖွဲ့ကို တောင်ကိုရီးယားရောက် မြန်မာ ၇၀၀ ကျော်နဲ့ စုဖွဲ့ထားတာပါ။

တောင်ကိုရီးယားမှာ မြန်မာ  ၃၀၀၀၀ ကျော်လောက်ရှိပြီး  အဲဒီအထဲက ထက်ဝက်ကျော် ပူးပေါင်းလာဖို့ မျှော်လင့် စည်းရုံးစုဆောင်းနေတယ်လို့ MFDMC - Korea အဖွဲ့ဝင်တစ်ယောက်က ပြောပါတယ်။

လက်ရှိမှာတော့ ထောက်ပံ့ရေးတပ်သား ၇၀၀ ကျော်သာ ပါဝင်ထားတဲ့အတွက် မေလ ၁ ရက်နေ့မှာ ကျင်းပမယ့် မြန်မာတွေရဲ့ ထောက်ပံ့တပ်သားသစ် စုဆောင်းပွဲ အခမ်းအနားကို တောင်ကိုရီးယားကို ရောက်နေတဲ့ မြန်မာပြည်သူတွေအားလုံး တက်ရောက်ပေးကြဖို့လည်း ဖိတ်ခေါ်လိုက်ပါတယ်။

မြန်မာ့နွေဦးတော်လှန်ရေးမှာ ရှေ့တန်းကတိုက်ပွဲဝင်နေကြတဲ့ သူရဲကောင်းတွေကို ပြည်ပရောက်မြန်မာတွေရဲ့ ထောက်ပံ့မှုက အရေးကြီးတဲ့အတွက်ကြောင့် တောင်ကိုရီးယား ပြည်သူတွေအနေနဲ့  MFDMC-Korea အဖွဲ့နဲ့ ဆက်သွယ်ပြီး ထောက်ပံ့တပ်သားအဖြစ် ပူးပေါင်းပါဝင်ကြဖို့လည်း ပွဲစီစဉ်သူတွေက ဖိတ်ခေါ်ထားပါတယ်။

စိတ်ဝင်စားသူ တောင်ကိုရီးယားရောက်မြန်မာပြည်သူတွေအနေနဲ့ MFDMC-Korea အဖွဲ့ရဲ့ လူမှုကွန်ရက် facebook link https://www.facebook.com/MFDMCkorea ကနေ ဆက်သွယ်နိုင်တယ်လို့ သိရပါတယ်။