ယူကရိန်းနိုင်ငံ မာရီယူပိုဆိပ်ကမ်းမြို့ အာဇိုစတယ် သံမဏိစက်ရုံထဲက အရပ်သားဦးရေ ဒါဇင် အတော်များများကို ဘေးကင်းရာ ရွှေ့အပြီး မေ ၂ ရက်က ရုရှားက ကျောထောက်နောက်ခံပေးထားတဲ့ တပ်တွေက စက်ရုံဆီကို ဂရဒ်ဒုံးကျည်နဲ့ ပစ်ခတ်ခဲ့ပါတယ်။

ရိုက်တာသတင်းဌာနက ရိုက်ကူးထားတဲ့ ရုပ်သံထဲမှာ ပစ်ခတ်အပြီး ဖျက်ဆီးခံ စက်ရုံဆီကနေ နက်မှောင်နေတဲ့ မီးခိုးထူတွေ တက်လာတာ တွေ့ရပါတယ်။

မာရီယူပိုမြို့ကို ရုရှားတပ်တွေက သိမ်းပြီးပြီလို့ ကြေညာအပြီး ယူကရိန်း တပ်သားတချို့နဲ့ အရပ်သားတွေဟာ အာဇိုစတယ် သံမဏိစက်ရုံထဲမှာ ခိုလှုံနေခဲ့တာပါ။ ဒီစက်ရုံဟာ အာဇော့ဗ်ပင်လယ်အနီး ဆိပ်ကမ်းမြို့ထဲမှာရှိပြီး ရုရှားတပ်တွေ လက်နက်ကြီးနဲ့ ပစ်ခတ်တာကို သီတင်းပတ်ချီ ခံစားခဲ့ရတာပါ။

ဒီစက်ရုံဟာ မြို့ထဲက ယူကရိန်းတပ်တွေရဲ့ နောက်ဆုံး ခြေကုပ်စခန်းလည်း ဖြစ်ပြီး စက်ရုံထဲက ပုန်းခိုကျင်းတွေထဲမှာ စစ်သားနဲ့ အရပ်သား အများအပြား ပုန်းနေတယ်လို့ သငင်းမှာ ဖော်ပြထားပါတယ်။

ဧပြီ ၃၀ နဲ့ မေ ၁ ရက်နေ့တွေမှာ လူ ၁၂၆ ယောက်ဟာ မာရီယူပိုမြို့ သံမဏိစက်ရုံနဲ့ ခွဲထွက်ရေးသမားတွေ ထိန်းချုပ်ထားတဲ့ ဒန်ညက်စ်ဒေသထဲက တခြားခရိုင်တွေထဲကနေ လုံခြုံရေးယာဉ်တန်းနဲ့ ထွက်သွားခဲ့ပြီလို့ ရုရှားစစ်တပ်က ပြောပါတယ်။

သူတို့ထဲက ၅၇ ယောက်က အဲဒီဒေသထဲမှာ ဆက်နေဖို့ ရွေးချယ်ခဲ့ပြီး ကျန်တဲ့သူတွေကတော့ ယူကရိန်းအစိုးရက ထိန်းချုပ်ထားတဲ့ အစိတ်အပိုင်းတွေဆီ ထွက်သွားကြဖို့ ဆုံးဖြတ်ခဲ့ကြတယ်လို့ ရုရှားစစ်တပ်က ပြောခဲ့ပါတယ်။

ရုရှားသိမ်းပိုက်ထားတဲ့ အဲဒီစက်ရုံထဲကနေ ကယ်ထုတ်ခံ ပထမအသုတ်ဟာ ဇာပူးရီယီရှာမြို့ကို မေ ၃ ရက်မှာ ရောက်လာဖို့ ယူကရိန်း နိုင်ငံသားတွေက မျှော်လင့်ထားသလို ကျန်ရစ်တဲ့ စစ်သည်တွေအတွက်လည်း စိုးရိမ်နေကြပါတယ်။

မာရီယူပိုမြို့တော်ဝန်ကတော့ အာဇိုစတယ် သံမဏိစက်ရုံထဲမှာ အရပ်သား အယောက် ၂၀၀ ကျော် ကျန်ရစ်ပြီး ရုရှားဗုံးကြဲတာ ခံနေရတဲ့ မာရီယူပို ဆိပ်ကမ်းမြို့ထဲမှာ အရပ်သား အယောက်တသိန်းလောက် ရှိသေးတယ်လို့ ပြောခဲ့ပါတယ်။