အမေရိကန်နိုင်ငံမှာ ကိုဗစ်-၁၉ ကပ်ရောဂါ ကူးစက်ခံရပြီး သေဆုံးသူဦးရေဟာ အယောက်တသန်း ပြည့်ခါနီးပြီလို့ ပြည်လုံးကျွတ် သွေးစစ်တမ်း ကောက်ယူနေတဲ့ အမေရိကန် ရောဂါထိန်းချုပ် ဟန့်တားရေးဌာန (CDC) က သတင်းထုတ်ပြန်လိုက်ပါတယ်။

အမေရိကန်လူဦးရေ စုစုပေါင်းရဲ့ ၅၈ ရာခိုင်နှုန်းနဲ့ ကလေးငယ် ၇၅ ရာခိုင်နှုန်းကျော်ဟာ ၂၀၂၀ ကူးစက်ကပ်ဘေး စတည်းက ခုထိ ကိုရိုနာဗိုင်းရပ်စ် ကူးစက်ခံခဲ့ရပြီးပြီလို့လည်း ပြောပါတယ်။

အမေရိကန်ရဲ့ လူဦးရေ အသိပ်သည်းဆုံးမြို့ဖြစ်ရာ နယူးယောက်မြို့ဟာ အမေရိကန်နိုင်ငံအတွင်း ရောဂါကူးစက်မှု အချက်အခြာအဖြစ် ကမ္ဘာ့ကျန်းမာရေးအဖွဲ့ကြီး (WHO) က ၂၀၂၀ မတ် ၁၁ ရက်မှာ ကြေညာခဲ့ပါတယ်။

နိုင်ငံရေးဖိအား တိုးလာတာနဲ့ ဆောင်းရာသီမှာ ကာကွယ်ဆေးမတိုးဘဲ ကူးစက်နှုန်းမြင့်တဲ့ အိုမီခရွန် ဗီဇမျိုးကွဲ ကူးစက်တာတွေရဲ့ ဖိအားတွေအောက်မှာ အမေရိကန်အစိုးရဟာ အများသုံး သယ်ယူပို့ဆောင်ရေး စနစ်အတွင်း မဖြစ်မနေ ပါးစပ် နှာခေါင်းစည်းတပ်ဖို့လိုမျိုး ကန့်သတ်ချက်တွေကို ပြန်ရုပ်သိမ်းခဲ့ရပါတယ်။

ကိုဗစ်-၁၉ သက်သာရေးအတွက် ၂၀၂၂ မေလထိ အမေရိကန်ဒေါ်လာ ၁ ထရီလီယံ သုံးခဲ့ရပေမဲ့ အကြမ်းဖျင်းအားဖြင့် တနိုင်ငံလုံးမှာ လူတသန်းလောက် ကူးစက်ခံ သေဆုံးခဲ့ရပါတယ်။

ကူးစက်ခံ သေဆုံးသူတွေထဲမှာ အမေရိကန် နိုင်ငံခြားရေးဝန်ကြီးဟောင်း ကောလင်းပါဝဲနဲ့ ရော့ခ်ဂီတပညာရှင် မိထ်လုဖ်တို့လည်း ပါပါတယ်။

အမေရိကန် လူဦးရေ ၆၆ ရာခိုင်နှုန်းကျော်ဟာ ကိုဗစ်-၁၉ ကာကွယ်ဆေးကို အပြည့်အဝ ထိုးနှံပြီးစီးထားပြီဖြစ်ပြီး လူဦးရေ ၄၆ ရာခိုင်နှုန်းနီးပါးကတော့ ဆေးအာနိသင်ထိန်းဆေး ဘုစတာကို ထိုးနှံပြီးကြပြီလို့ ပြည်ထောင်စု သတင်းအချက်အလက်တွေက ဆိုထားပါတယ်။