အာရပ်စော်ဘွားများပြည်ထောင်စု (ယူအေအီး)နိုင်ငံမှာ ကွယ်လွန်သွားတဲ့ နိုင်ငံရဲ့သမ္မတ ခါလီဖာအတွက် ဝမ်းနည်းခြင်း အထိမ်းအမှတ်အဖြစ် မေ ၁၃ ရက်က နေအိမ်တွေနဲ့ အဆောက်အအုံတွေမှာ အလံတဝက် လွှင့်ထူထားကြပါတယ်။

သူဟာ အနောက်ကမ္ဘာနဲ့ နီးစပ်သူ၊ နိုင်ငံကို ခေတ်မီအောင် ဆောင်ရွက်ပေးခဲ့သူအဖြစ် သတ်မှတ်ခံ ရသူပါ။   အထူးသဖြင့် သူဟာ ပင်လယ်ကွေ့ အာရပ်နိုင်ငံကို အမေရိကန်ပြည်ထောင်စုနဲ့ မဟာမိတ်တွေနဲ့ နီးစပ်အောင် ဆောင်ရွက်ခဲ့သူ ဖြစ်ပါတယ်။ 

မေ ၁၃ ရက်ကတော့ သူ ကွယ်လွန်သွားတဲ့အကြောင်း သမ္မတရေးရာဝန်ကြီးဌာနက အတည်ပြုပါတယ်။  သမ္မတ ခါလီဖာဟာ ၁၉၄၈ ခုနှစ်မှာ မွေးဖွားခဲ့သူ ဖြစ်ပြီး သူ့ဖခင် ကွယ်လွန်တဲ့ ၂၀၀၄ ခုနှစ်ကတည်းက ယူအေအီးနိုင်ငံရဲ့သမ္မတ ဖြစ်လာခဲ့ပါတယ်။ 

ဒါပေမဲ့  ၂၀၁၄ ခုနှစ်မှာ လေဖြတ်ဝေဒနာ ခံစားရပြီး လူမြင်ကွင်းကို ပျောက်ကွယ်နေခဲ့ပါတယ်။ အဲဒီ အချိန်ကစလို့  တာဝန်အရပ်ရပ်ကို အဖေတူ အမေကွဲ ညီအစ်ကို  အိမ်ရှေ့စံ မိုဟာမက် ဘင်  ဇာရိကို လွှဲအပ်ထားတာ ဖြစ်ပါတယ်။

ယူအေအီးရဲ့ နိုင်ငံပိုင်မီဒီယာမှာတော့ MbZ လို့ အတိုကောက်ခေါ်ကြတဲ့  အိမ်ရှေ့မင်းသား  မိုဟာမက်ဟာ ကွယ်လွန်သွားတဲ့ သမ္မတနေရာကို ဆက်ခံသူ ဖြစ်လာမယ်လို့ ရည်ညွှန်း ဖော်ပြ နေကြပါတယ်။