မန်ချက်စတာယူနိုက်တက် နည်းပြ တန်ဟတ်ဂ်ဟာ ချဲလ်ဆီးကွင်းလယ်လူ မေဆန်မောင့်ကို ခေါ်ယူဖို့ စိတ်ဝင်စားနေပြီး အခြေအနေကို ‌စောင့်ကြည့်နေတယ်လို့ သိရပါတယ်။

မေဆန်မောင့်ဟာ ချဲလ်ဆီးနဲ့ ၂ နှစ်သက်တမ်း ကျန်ရှိနေပြီး ပိုင်ရှင်သစ် အပြောင်းအလဲ ဖြစ်ခဲ့ပြီးနောက်မှာ သက်တမ်းတိုးဖို့ အစီအစဉ်နဲ့ ပတ်သက်ပြီး ဆွေးနွေးခြင်း မရှိသေးပါဘူး။

တပတ်လုပ်ခ ပေါင် ၈၈,၀၀၀ သာရရှိလို့ အသင်းရဲ့ လုပ်ခလစာ အနည်းဆုံး ကစားသမားတွေထဲက တဦးဖြစ်ပါတယ်။

မေဆန်မောင့်ဟာ ၂၀၁၇-၂၀၁၈ ဘောလုံးရာသီက ဟော်လန်ကလပ် ဗစ်တက်ဆီအသင်းမှာ အငှားကစားခဲ့ပြီး စုစုပေါင်း ၃၉ ပွဲမှာ ၁၄ ဂိုး သွင်းယူနိုင်ခဲ့ပါတယ်။ အဲဒီအချိန်ကတည်းက မေဆန်မောင့်ရဲ့ခြေစွမ်းကို ပြိုင်ဘက်နည်းပြဖြစ်တဲ့ အဲရစ်တန်ဟတ်ဂ်က သဘောကျခဲ့တယ်လို့ ဗြိတိန်သတင်းစာ The Sun က ဖော်ပြခဲ့ပါတယ်။

ချဲလ်ဆီးအသင်းဟာ ခရစ္စတီယန်ဆန်နဲ့ ရူဒီဂါတို့လို ခံစစ်ကစားသမားတွေကို လက်လွှတ်ခဲ့ရတာကြောင့် ခံစစ်ပိုင်းကိုသာ အင်အားဖြည့်တင်းဖို့ စီစဉ်ထားပြီး မေဆန်မောင့်ကို သက်တမ်းတိုးချင်ပေမဲ့ လုပ်ခတိုးပေးဖို့တော့ အစီအစဉ် မရှိပါဘူး။

ဒီအခြေအနေကို နည်းပြတန်ဟတ်ဂ်က စောင့်ကြည့်နေပြီး မေဆန်မောင့်ကို ခေါ်ယူသွားဖို့ ဆန္ဒရှိနေတယ်လို့ သိရပါတယ်။