၂၀၂၂−၂၀၂၃ ဘဏ္ဍာနှစ်ရဲ့ ပထမလဖြစ်တဲ့ ဧပြီလအတွင်း မြန်မာနိုင်ငံကို တရုတ်နဲ့ ဟောင်ကောင်တို့ရဲ့  ရင်းနှီးမြှုပ်နှံမှုလုပ်ငန်း ၄ ခု ၀င်ရောက်ခဲ့တယ်လို့ စစ်ကောင်စီလက်အောက်ခံ ရင်းနှီးမြှုပ်နှံမှုနဲ့ ကုမ္ပဏီများ ညွှန်ကြားမှုဦးစီးဌာနစာရင်းအရ သိရပါတယ် ။

တရုတ်ရင်းနှီးမြှပ်နှံမှု လုပ်ငန်း ၃ ခု၊ ဟောင်ကောင် ရင်းနှီးမြှုပ်နှံမှု လုပ်ငန်း ၁ ခု၊ စုစုပေါင်း ၄ ခုသာ ၀င်ရောက်ထားတာဖြစ်ပါတယ်။

အရင်၀င်ရောက်ထားပြီး လုပ်ငန်းတစ်ခုက ရင်းနှီးမြှုပ်နှံမှုပမာဏ  တိုးမြှင့်တာ အပါအ၀င် တစ်လအတွင်း  ၀င်ရောက်ခဲ့တဲ့ စုစုပေါင်း နိုင်ငံခြားရင်းနှီးမြှုပ်နှံမှု ပမာဏက ကန်ဒေါ်လာ ၅ သန်းကျော် ရှိပါတယ်။

ပထမတစ်လအတွင်း ကုန်ထုတ်လုပ်မှု ကဏ္ဍ တစ်ခုတည်းမှာသာ ရင်းနှီးမြှုပ်နှံမှု ၀င်ရောက်ခဲ့တာဖြစ်ပြီး ကျန်ကဏ္ဍ ၁၁ ခုမှာ လုံး၀ ၀င်ရောက်ခဲ့ခြင်း မရှိပါဘူး။

ပြီးခဲ့တဲ့ ၂၀၂၁ အောက်တိုဘာလကနေ မတ်လအထိ  ကြားကာလ ဘဏ္ဍာနှစ် ၆ လမှာလည်း ပြည်ပ ရင်းနှီးမြှုပ်နှံမှု  အမေရိကန်ဒေါ်လာ သန်း ၆၄၀ ကျော်သာ ၀င်ရောက်ခဲ့ပြီး ဆယ်စုနှစ်အတွင်း ၀င်ရောက်မှု အနည်းဆုံး ဖြစ်ခဲ့ပါတယ်။

အဲဒီကြားကာလ ၆ လအတွင်းမှာလည်း ကုန်ထုတ်လုပ်ရေးကဏ္ဍနဲ့ တခြား၀န်ဆောင်မှု ကဏ္ဍအတွင်းမှာသာ ရင်းနှီးမြှုပ်နှံမှု အဓိက ၀င်ရောက်ပြီး၊ သတ္တုကဏ္ဍ၊ ရေနံနဲ့ သဘာ၀ဓာတ်ငွေ့ကဏ္ဍ၊ စက်မှုကဏ္ဍတို့မှာ ရင်းနှီးမြှုပ်နှံမှု လုံး၀ ၀င်ရောက်ခဲ့ခြင်းမရှိပါဘူး။

အဲဒီ ၆ လ ဘတ်ဂျတ်ကာလအတွင်းမှာ စင်ကာပူ၊ တရုတ်၊ ဟောင်ကောင်နဲ့ ကိုရီးယားနိုင်ငံတို့ရဲ့ ရင်းနှီးမြှပ်နှံမူက အများဆုံးဖြစ်ပြီး အဲဒီနိုင်ငံတွေရဲ့ ရင်းနှီးမြှုပ်နှံမူတွေကလည်း အာဏာသိမ်းပြီးနောက်ပိုင်း သိသိသာသာ ကျဆင်းခဲ့ပါတယ်။

အဲဒီလို ပြည်ပရင်းနှီးမြှုပ်နှံမှု ဝင်ရောက်တာ သိသိသာသာ ကျဆင်းလာတဲ့အပြင် ပြီးခဲ့တဲ့ ၂၀၂၁ ခုနှစ်အတွင်းက ပြည်တွင်းမှာ ရှိနေပြီးသား ရင်းနှီးမြှုပ်နှံမှုကြီးတွေ ပြန်ထွက်တာ လုပ်ငန်းရပ်ဆိုင်းတာတွေ ရှိခဲ့ပါတယ်။

လက်ရှိမှာလည်း အလုပ်အကိုင်ရှားပါးမှုတွေ မြင့်မားနေပါတယ်။ ဇွန် ၁ ရက် နေပြည်တော်မှာ ပြုလုပ်တဲ့ သတင်းစာရှင်းလင်းပွဲမှာတော့ စစ်ကောင်စီ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက အလုပ်အကိုင်အခွင့်အလမ်းတွေ ဖန်တီးပေးဖို့ ကြိုးပမ်းနေတယ်လို့ ပြောခဲ့ပါတယ်။ 

မြန်မာနိုင်ငံမှာ အရပ်သားအစိုးရ တာ၀န်ယူထားတဲ့ ၂၀၁၉−၂၀၂၀ ဘဏ္ဍာနှစ်က နိုင်ငံခြားရင်းနှီးမြှပ်နှံမှု ပမာဏက ၄ ဒသမ ၈ ဘီလီယံကျော်  ၀င်ရောက်ခဲ့ပြီး၊ အရပ်သားအစိုးရလက်ထက်မှာ ၄ လ၊ စစ်ကောင်စီလက်အောက်မှာ ၈ လ ရှိခဲ့တဲ့ ၂၀၂၀−၂၀၂၁ ဘဏ္ဍာနှစ်မှာ  ရှိပြီးလုပ်ငန်းတွေက ရင်းနှီးမြှုပ်နှံမှု တိုးမြှင့်တာတွေ အပါအ၀င် စုစုပေါင်း ၀င်ရောက်ခဲ့တဲ့  ရင်းနှီးမြှုပ်နှံမူပမာဏက အမေရိကန် ဒေါ်လာ  ၃ ဒသမ ၇၉၁ ဘီလီယံ သာရှိခဲ့ပြီး ၂၂ ရာခိုင်နှုန်း လျော့ကျခဲ့ပါတယ်။