ကွင်းလယ်ကစားသမားပေါ့ဘာ အသင်းကနေ ထွက်ခွါသွားတဲ့အပေါ်မှာ မန်ယူအသင်းပရိသတ်တွေက ပျော်ရွှင် ကျေနပ်နေကြပါတယ်။

ပေါ့ဘာဟာ မန်ယူအသင်းနဲ့ ဇွန် ၃၀ ရက်က စာချုပ်သက်တမ်း ကုန်ဆုံးခဲ့တာဖြစ်ပြီး စာချုပ်သက်တမ်း မတိုးတော့ဘဲ အသင်းကနေ ထွက်ခွါခွင့်ပြုခဲ့တာပါ။

မန်ယူအသင်းကတော့ အသင်းအတွက် ပေးဆပ်ကစားခဲ့တဲ့အပေါ် ကျေးဇူးတင်ရှိကြောင်း ကြေညာချက်ထုတ်ပြန်ခဲ့ပေမဲ့ ပရိသတ်တွေကတော့ ပေါ့ဘာထွက်ခွါတာဟာ သတင်းကောင်းတခုဖြစ်တယ်လို့ ဆိုရှယ်မီဒီယာတွေမှာ မှတ်ချက်ပေးခဲ့ကြပါတယ်။

“လက်ရှိကာလအတွင်းမှာ အသင်းဆီကနေကြားရတဲ့ အကောင်းဆုံးသတင်းပဲ။ ပေါ့ဘာမရှိလေ ကောင်းလေပဲ” လို့ မန်ယူပရိတ်သတ်တဦးက မှတ်ချက်ပေးပါတယ်။

နောက်ထပ် မန်ယူပရိသတ်တဦးကတော့ ပေါ့ဘာအတွက် ဆုမွန်ကောင်းတောင်းပေးတဲ့ အသင်းရဲ့ ကြေညာချက်အပေါ် ချီးကျူးခဲ့ပြီး စကားနည်းနည်းပြောပြီး အလုပ်များများလုပ်ဖို့ သင်ယူရမှာဖြစ်ကြောင်း မှတ်ချက်ပေးခဲ့ပါတယ်။

အသက် ၂၉ နှစ်ရှိ ပေါ့ဘာဟာ ၂၀၁၆ ခုနှစ်က ဂျူဗင်တပ်အသင်းကနေ ပေါင် ၈၉ သန်းနဲ့ မန်ယူအသင်းဆီ တကျော့ပြန် ရောက်လာခဲ့တာတာပါ။ အသင်းအတွက် စုစုပေါင်း ၂၂၆ ပွဲမှာ ၃၉ ဂိုး သွင်းယူပေးခဲ့ပြီး ယူရိုပါလိဂ်ဖလားနဲ့ လိဂ်ရှုံးထွက်ဖလားတွေ ရယူပေးခဲ့ပါတယ်။