တရုတ်နိုင်ငံအနောက်တောင်ပိုင်း၊ စီချွမ်ပြည်နယ်၊ ယာအန်းမြို့က လူရှန်းမြို့နယ်မှာ အင်အား ရစ်ချ်တာစကေး ၆ ဒသမ ၁ ရှိ ငလျင်တရပ် ဇွန်လ ၁ ရက် ညနေ ၅ နာရီမှာ လှုပ်ခတ်ခဲ့ပြီး လူ ၄ ယောက်ထက်မနည်း သေဆုံးကာ ၁၄ ယောက် ဒဏ်ရာရတယ်လို့ တရုတ် ငလျင်ကွန်ရက်ဌာနက ပြောပါတယ်။

ငလျင်ကြောင့် လူ ၄ ယောက်သေဆုံးပြီး ၁၄ ယောက် ဒဏ်ရာရတယ်လို့  ယာအန်း ကျန်းမာရေးဌာနက ပြောပါတယ်။ ဒဏ်ရာရသူတွေကိုတော့ ဆေးကုပေးဖို့ ဆေးရုံဆီ ခေါ်သွားပါပြီ။ 

ငလျင်ဗဟိုချက်ဟာ မြေအောက်အနက် ၁၇ ကီလိုမီတာကို ဗဟိုပြုပြီး မြောက်လတ္တီကျု ၃၀ ဒသမ ၃၇၊ အရှေ့လောင်ဂျီကျု ၁၀၂ ဒသမ ၉၄ ဒီဂရီမှာ ရှိတယ်လို့ ဌာနက ပြောပါတယ်။

ငလျင်ဗဟိုချက်ဟာ ဘောင်ရှင်းမြို့မှာ ၁၂ ကီလိုမီတာ၊ တီယန်ချွမ်မြို့နယ်ကနေ ၃၈ ကီလိုမီတာနဲ့ ယာအန်းမြို့ကနေ ၄၁ ကီလိုမီတာဝေးပြီး ချန်ဒူမြို့နဲ့ ၁၁၃ ကီလိုမီတာ ဝေးပါတယ်။

ငလျင်ကြောင့် တရုတ်မီးရထားအာဏာပိုင်အဖွဲ့က ပြေးဆွဲနေတဲ့ ရထားတွေကို  သက်ဆိုင်ရာ လမ်းပိုင်းတွေအလိုက် အရေးပေါ် အမြန်ရပ်ဖို့ ပြောခဲ့ပါတယ်။