သြစတြေးလျဝန်ကြီးချုပ် အန်တိုနီ အယ်ဘန်နိစ် Anthony Albanese က အိမ်နီးချင်း အင်ဒိုနီးရှား နဲ့ လုံခြုံရေးကဏ္ဍမှာ ပူးပေါင်းဆောင်ရွက်မှုကို တိုးမြှင့်သွားမယ်လို့ သူရဲ့ ပထမဆုံး ပြည်ပနိုင်ငံ ချစ်ကြည်ရေး ခရီးစဉ်အတွင်း ပြောဆိုပါတယ်။ 

အင်ဒိုနီးရှားနဲ့ ကုန်သွယ်ရေး၊ ရာသီဥတု ပြောင်းလဲမှုနဲ့ ဆိုင်တဲ့ ကိစ္စတွေမှာလည်း ပူးပေါင်း ဆောင်ရွက်မှုကို မြှင့်တင်သွားမယ့်အကြောင်း၊ နိုဝင်ဘာမှာ အင်ဒိုနီးရှားက ဦးဆောင်ကျင်းပမယ့် ဂျီ ၂၀ အစည်းအဝေးကို တက်ရောက်ဖို့ စိတ်ဝင်စားတဲ့အကြောင်းလည်း ဝန်ကြီးချုပ် အယ်ဘန်နိစ်က ပြောပါတယ်။  

အင်ဒိုပစိဖိတ်ဒေသတွင်းမှာ တရုတ်နဲ့ အမေရိကန် ပြည်ထောင်စုတို့ကြား တင်းမာမှု မြင့်တက်နေတဲ့ အချိန်မှာ သြစတြေးလျ ဝန်ကြီးချုပ်သစ်ကလည်း ဒေသတွင်း နိုင်ငံတွေနဲ့ ဆက်ဆံရေး တိုးမြှင့်ဖို့ ကြိုးပမ်းလာတာပါ။ 

မေလထဲ တောင်တရုတ်ပင်လယ်ပြင်မှာ တရုတ်တိုက်လေယာဉ်တစင်းက သြစတြေးလျ ကင်းထောက်လေယာဉ်အနားကနေ အန္တရာယ်ရှိလောက်တဲ့ အနေအထားနဲ့ ဖြတ်ပျံသွားတာကို ရန်စတဲ့ လုပ်ရပ်လို့ ဝန်ကြီးချုပ်က ပြောခဲ့ပါတယ်။ 

သြစတြေးလျဟာ ဒေသတွင်းက နိုင်ငံတွေ၊ အာဆီယံလို အဖွဲ့နဲ့ ဆက်ဆက်ရေးကိုလည်း တိုးမြှင့်သွားဖို့ ရည်ရွယ်ချက် ရှိနေတာကြောင့် သူ့ရဲ့ အင်ဒိုနီးရှား ခရီးစဉ်အတွင်း ထိပ်တန်း  စီးပွားရေးကိုယ်စားအဖွဲ့၊ နိုင်ငံခြားရေးဝန်ကြီး ပင်နီဝမ်းနဲ့ ကုန်သွယ်ရေး ဝန်ကြီး ဒွန်း ဖာရယ် တို့ကိုလည်း လိုက်ပါသွားကြပါတယ်။