နိုင်ငံခြားရေးဝန်ကြီး အန်တိုနီ ဘလင်ကန်က အမေရိကန် အစိုးရအနေနဲ့ မြောက်ကိုရီးယားကို ဆက်ပြီး ဖိအားပေးသွားမယ်လို့ ဇွန် ၁၃ ရက်မှာ ပြောပါတယ်။ 

မြောက်ကိုရီးယားဟာ ဒီနှစ်ထဲမှာ ၇ ကြိမ်မြောက် နယူးကလီးယား စမ်းသပ်မှုကို ဒီလထဲမှာ ပြုလုပ်ဖို့ ပြင်ဆင်နေတာနဲ့ ပတ်သက်လို့ ဝန်ကြီး ဘလင်ကန်က အခုလို ပြောလိုက်တာပါ။ 

“အမေရိကန် အစိုးရရဲ့ ရည်မှန်းချက်က တည်ငြိမ်တဲ့ဒေသ၊ တည်ငြိမ်တဲ့ ကမ္ဘာ ဖြစ်ဖို့ပါပဲ။ မြောက်ကိုရီးယား အစိုးရက လက်ရှိ လမ်းကြောင်းကို မပြောင်းလဲမချင်းတော့ ဆက်ပြီး ဖိအားပေးရမယ်”လို့ ဝန်ကြီး ဘလင်ကန်က တောင်ကိုရီးယားနိုင်ငံခြားရေးဝန်ကြီးနဲ့ အတူ ဝါရှင်တန်က ပူးတွဲ သတင်းစာရှင်းလင်းပွဲမှာ ပြောပါတယ်။

တောင်ကိုရီးယားနိုင်ငံခြားရေး ဝန်ကြီးကလည်း မြောက်ကိုရီးယားဘက်က နယူးကလီးယား စမ်းသပ်မှုတွေကို ထပ်လုပ်မယ်ဆိုရင် ပြတ်သားတဲ့ တုံ့ပြန်မှုတွေနဲ့ ကြုံတွေ့ရမယ်လို့ ပြောပါတယ်။ 

မြောက်ကိုရီးယားဟာ ဇွန် ၁၂ ရက်နေ့ ဒေသစံတော်ချိန် မနက် ၈ နာရီနဲ့ ၁၁ နာရီကြားမှာ အမြောက် အချက်ပေါင်းများစွာ ပစ်ခတ်ခဲ့တယ်လို့ တောင်ကိုရီးယား စစ်တပ်က ပြောပါတယ်။