အမေရိကန်နိုင်ငံသား နှစ်ယောက်ကို ရုရှားတပ်ဖွဲ့တွေက ဖမ်းဆီးလိုက်ကြောင်း သတင်းတွေ ထွက်ပေါ်လာပြီးနောက်မှာ ယူကရိန်းကို အမေရိကန်တွေ ခရီးမထွက်ကြဖို့ အိမ်ဖြူတော်က ဇွန် ၁၅ ရက်မှာ တိုက်တွန်းထားပါတယ်။

ဒီသတင်းတွေ အမှန်ဖြစ်တယ်ဆိုရင် အမေရိကန်ပြည်ထောင်စုက သူတို့ပြန်လွတ်ဖို့ တတ်နိုင်သမျှ အားလုံးလုပ်ဆောင်ပေးမှာဖြစ်ကြောင်း အမျိုးသားလုံခြုံရေးကောင်စီ ပြောရေးဆိုခွင့်ရှိသူ ဂျွန်ကာဘီက သတင်းထောက်တွေကို ပြောပါတယ်။

သမ္မတ ဂျိုးဘိုင်ဒင်ဟာ ဇွန် ၁၅ ရက်က ယူကရိန်းအတွက် သင်္ဘောဖျက်ဒုံးပျံစနစ်၊ အမြောက်ဒုံးကျည်တွေ၊ တာဝေးပစ်ဟောင်ဝစ်ဇာအမြောက်တွေ၊ ကမ်းရိုးတန်း ကာကွယ်ရေး လက်နက်တွေနဲ့ ခဲယမ်းမီးကျောက်တွေ ပါဝင်တဲ့ အမေရိကန်ဒေါ်လာ ၁ ဘီလီယံတန် လက်နက်အသစ်တွေ ထပ်ပေးသွားမှာဖြစ်ကြောင်း ကြေညာခဲ့ပါတယ်။

ယူကရိန်းသမ္မတ ဗိုလိုဒီမာ ဇလန်းစကီးနဲ့ ၄၁ မိနစ်ကြာ ဖုန်းပြောဆိုမှုအတွင်း ဘိုင်ဒင်က လက်နက်သစ်အကြောင်း ပြောကြားခဲ့ပါတယ်။

ဒါ့အပြင် ယူကရိန်းပြည်သူတွေကို ကူညီဖို့ လူသားချင်းစာနာထောက်ထားမှု အကူအညီ ဒေါ်လာ ၂၂၅ သန်း ထပ်တိုးပေးမယ်လို့လည်း သမ္မတဘိုင်ဒင်က ကြေညာခဲ့ပါတယ်။

ဘေးကင်းတဲ့ သောက်သုံးရေ၊ အရေးကြီးဆေးဝါးနဲ့ ကျန်းမာရေးစောင့်ရှောက်မှု၊ အစားအစာ၊ အမိုးအကာနဲ့ မရှိမဖြစ်လိုအပ်တဲ့ ပစ္စည်းတွေကို ဝယ်ယူဖို့ မိသားစုတွေအတွက် ငွေသားထောက်ပံ့ပေးတာတွေ ပါဝင်မယ်လို့ ဆိုပါတယ်။

ယူကရိန်းအတွက် နောက်ဆုံးပေါ် လက်နက်ပံ့ပိုးမှု အစီအစဉ်ထဲမှာ ဟောင်ဝစ်ဇာအမြောက် ၁၈ စင်းနဲ့ သူတို့အတွက် ကျည် ၃၆,၀၀၀ တောင့်၊ ဟာပွန်းန်  ကမ်းရိုးတန်းကာကွယ်ရေးစနစ် ၂ ခု၊ အမြောက်ဒုံးကျည်တွေ၊ လုံခြုံရေးရေဒီယိုတွေ၊ ထောင်နဲ့ချီတဲ့ ညကြည့်ကိရိယာတွေနဲ့ လေ့ကျင့်ရေးတွေအတွက် ရန်ပုံငွေတွေ ပါဝင်ပါတယ်။