close

ကောက်ပဲသီးနှံနှင့် နေကြာဆီများ နိုင်ငံပြင်ပထုတ်နိုင်ရန် ယူကရိန်း နည်းလမ်းရှာ

ကမ္ဘာ့အကြီးဆုံး ကောက်ပဲသီးနှံ တင်ပို့သူနိုင်ငံတွေထဲက တနိုင်ငံဖြစ်တဲ့ ယူကရိန်းဟာ ရုရှားကျူးကျော်မှု နောက်ပိုင်း သင်္ဘောနဲ့တင်ပို့ရေး ရပ်တန့်နေခဲ့ရအပြီးမှာ သူ့ရဲ့ ကောက်ပဲသီးနှံတွေနဲ့ နေကြာဆီတွေကို နိုင်ငံပြင်ပ ထုတ်နိုင်ရေး နည်းလမ်းရှာနေပါတယ်။

ရုရှားဟာ ယူကရိန်းရဲ့ ပင်လယ်နက် ဆိပ်ကမ်းတွေကို ပိတ်ပစ်ပြီး တကမ္ဘာလုံး အငတ်ဘေးဆိုက်အောင် ဖန်တီးနေတယ်လို့ အနောက်နိုင်ငံတွေက စွပ်စွဲထားပါတယ်။

ရုရှားကတော့ နိုင်ငံတကာ စားနပ်ရိက္ခာ အကျပ်အတည်းအတွက် တာဝန်ခံဖို့ ငြင်းပြီး အနောက်နိုင်ငံတွေရဲ့ ဒဏ်ခတ်မှုကို ပြန်အပြစ်တင်ထားပါတယ်။

ရုရှားအပေါ် အနောက်နိုင်ငံတွေက ဒဏ်ခတ်တာကြောင့်ရော စစ်ပွဲကြောင့်ပါ ကောက်ပဲသီးနှံ၊ ဟင်းချက်ဆီ၊ ဓာတ်မြေဩဇာနဲ့ စွမ်းအင်စျေးတွေ မြင့်တက်ခဲ့ပါတယ်။

အဆင်းရဲဆုံးနိုင်ငံတချို့ အပါအဝင် နိုင်ငံအများအပြားက ဂျုံတင်သွင်းမှု ထက်ဝက်ကျော်အတွက် ယူကရိန်းနဲ့ နိုင်ငံအများအပြားက ရုရှား ဓာတ်မြေဩဇာနဲ့ ရေနံ ဓာတ်ငွေ့တွေကို မှီခိုနေရလို့ ယူကရိန်းစစ်ပွဲဟာ ကမ္ဘာ့စားနပ်ရိက္ခာ အကျပ်အတည်းကို ခြိမ်းခြောက်နေပါတယ်။

ရုရှားနဲ့ ယူကရိန်း နှစ်နိုင်ငံပေါင်းဟာ ကမ္ဘာ့ ဂျုံ ဖြန့်ဖြူးမှုရဲ့ သုံးပုံတပုံထိ ထည့်ဝင်နေတာပါ။

အိန္ဒိယက တင်ပို့မှု ပိတ်ပင်တာ၊ မြောက်အမေရိကနဲ့ အနောက်ဥရောပက ဆိုးရွားတဲ့ ရာသီဥတုကြောင့် ကောက်ပဲသီးနှံထွက်နှုန်း ကျဆင်းတာတွေက ယူကရိန်းနဲ့ ရုရှားတို့ရဲ့ အရေးပါပုံကို မီးမောင်းထိုးပြသလို ပိုဖြစ်ခဲ့ပါတယ်။

ယူကရိန်းဟာ ပြောင်း၊ မုယောစပါး၊ နေကြာဆီနဲ့ မုန်ညင်းဆီတို့ကို အဓိက တင်ပို့နေတဲ့ နိုင်ငံပါ။

ရုရှားနဲ့ ဘဲလာရုစ်တို့ကတော့ စစ်ပွဲအတွင်း ရုရှားအစိုးရအား ကျောထောက်နောက်ခံပြု ပိတ်ဆို့အရေးယူမှုတွေကို ခံနေရပြီး သီးနှံအာဟာရအတွက် ပိုတက်ရှ်မြေဩဇာရဲ့ ၄၀ ရာခိုင်နှုန်းကျော်ကို တကမ္ဘာလုံးဆီ တင်ပို့နေပါတယ်။

ရုရှား-ယူကရိန်း ပဋိပက္ခကြောင့် အိုဒက်ဆာနဲ့ ယူကရိန်းရဲ့ တခြားဆိပ်ကမ်းတွေက သင်္ဘောလမ်းကြောင်းတွေ ပြန်ဖွင့်ဖို့ ကုလသမဂ္ဂက လှုံ့ဆော်ပေးခဲ့ရပါတယ်။

//
Up