ဒိန်းမတ်ကွင်းလယ်လူအဲရစ်ဆင်ဟာ လန်ဒန်မြို့မှာပဲ ဆက်လက်နေထိုင်လိုတာကြောင့်  သူ့ကိုခေါ်ယူလိုနေတဲ့မန်ယူအသင်းအတွက် အခက်တွေ့နေပါတယ်။

ဒိန်းမတ်ကွင်းလယ်လူဟာ ယူရိုပြိုင်ပွဲမှာ နှလုံးဖောက်ပြီးလဲကျခဲ့ပေမဲ့ အနားယူကုသခဲ့ပြီးတဲ့နောက်မှာ လန်ဒန်အခြေစိုက်ကလပ် ဘရန့်ဖို့ဒ်ဆီကို ရာသီဝက်စာချုပ်နဲ့ ပြောင်းရွှေ့ကစားခဲ့တာပါ။

ဘရန့်ဖို့ဒ်အသင်းမှာ ပရီးမီးယားလိဂ် ၁၁ ပွဲကစား ၁ ဂိုးသွင်းပြီး ၄ ကြိမ်ဂိုးဖန်တီးမှုပြုလုပ်နိုင်ခဲ့တဲ့ အဲရစ်ဆင်ကို မန်ယူအသင်းကခေါ်ယူလိုပေမယ့် လန်ဒန်ကနေ မန်ချက်စတာကို ပြောင်းရွှေ့လိုခြင်းမရှိတဲ့ ကစားသမားရဲ့ဆန္ဒကြောင့်အခက်တွေ့နေကြောင်း The Athletic သတင်းမှာ ဖော်ပြပါတယ်။

အသက် ၃၀ အရွယ် အဲရစ်ဆင်ဟာ ဘရန့်ဖို့ဒ်နဲ့စာချုပ်သက်တမ်းကုန်ဆုံးခဲ့ပေမယ့် နည်းပြသောမက်စ် ဖရန့်နဲ့ တွေ့ဆုံဆွေးနွေးခဲ့ပြီးနောက်မှာ စာချုပ်သက်တမ်း တိုးသွားဖို့ရှိပါတယ်။ အဲရစ်ဆင်ကတော့ ချန်ပီယံလိဂ်ပြိုင်ပွဲပြန်လည်ကစားခွင့်ရရင်ပျော်ရွှင်ရမှာဖြစ်ပေမဲ့ အဓိကလိုအပ်တဲ့အရာမဟုတ်ကြောင်း ဆွီဒင်မီဒီယာတစ်ခုနဲ့ အင်တာဗျူးမှာပြောထားပါတယ်။