မန်ယူနိုက်တက်အသင်းနဲ့ ယှဉ်ပြိုင်ကစားရမှာကို အနှစ်သက်ဆုံးဖြစ်ကြောင်း မန်စီးတီးတိုက်စစ်မှူးသစ် ဟာလန်းက ပြောကြားလိုက်ပါတယ်။

မန်စီးတီးအသင်းဟာ ခေါ်ယူထားတဲ့ ကစားသမားတွေကို ဇူလိုင် ၁၀ ရက် မနေ့က ပရိသတ်နဲ့ မိတ်ဆက်ရာမှာ အခမ်းအနားတင်ဆက်သူ ဒမ်နီဂျက်ဆင်က ဘယ်အသင်းနဲ့ယှဉ်ပြိုင်ကစားရဖို့ အနှစ်သက်ဆုံးဖြစ်မလဲလို့ မေးမြန်းခဲ့ရာမှာ ဟာလန်းက မန်ယူအသင်းနဲ့ ဖြစ်ကြောင်း ပြန်လည် ဖြေကြားခဲ့တာပါ။

“ကျနော် စကားလုံးတွေ အများကြီးမပြောချင်ပေမဲ့ ဒီမေးခွန်းအတွက်တော့ ပြောရပါမယ်။ ယှဉ်ပြိုင်ကစားဖို့ အကြိုက်ဆုံးအသင်းဆိုရင် မန်ချက်စတာယူနိုက်တက်အသင်းဖြစ်ပါတယ်”လို့ ဟာလန်းက ပြောပါတယ်။

မန်ယူနိုက်တက်နဲ့ မန်စီးတီးအသင်းတို့ဟာ မြို့ခံပြိုင်ဘက်တွေလည်းဖြစ်တာကြောင့် ဟာလန်းရဲ့အဖြေနဲ့ ပတ်သက်ပြီး မန်စီးတီးပရိသတ်တွေက လက်ခုပ်တီးပြီး အားပေးခဲ့ကြပါတယ်။

ဟာလန်းဟာ ဒေါ့မွန်ကနေ ပေါင် ၅၁ သန်းနဲ့ မန်စီးတီးကို  ပြောင်းရွှေ့လာခဲ့တာဖြစ်ပြီး ၅ နှစ်စာချုပ် ချုပ်ဆိုခဲ့ပါတယ်။