လီဗာပူးအသင်းကို အနိုင်ရခဲ့တဲ့ ရာသီကြို ချစ်ကြည်ရေးခြေစမ်းပွဲစဉ်မှာ မန်ယူနိုက်တက် အသင်းသားတွေရဲ့ အလားအလာကောင်းကို မြင်တွေ့ခဲ့ရကြောင်း နည်းပြတန်ဟတ်ဂ်က ပြောပါတယ်။

မန်ယူအသင်းဟာ ဇူလိုင် ၁၂ ရက် မနေ့က ဘန်ကောက်မြို့မှာ ယှဉ်ပြိုင်ကစားခဲ့တဲ့ လီဗာပူးနဲ့ ပွဲစဉ်မှာ ၄ ဂိုး ဂိုးမရှိနဲ့ အနိုင်ရပြီး Bangkok Century Cup 2022 ဆုဖလားကို ရရှိသွားခဲ့တာ ဖြစ်ပါတယ်။

မန်ချက်စတာယူနိုက်တက်အတွက် အနိုင်ဂိုးတွေကိုတော့ ပထမပိုင်းပွဲချိန် ၁၂ မိနစ်မှာ ဆန်ချို၊ ပွဲချိန် မိနစ် ၃၀ မှာ ဖရက်ဒ်၊ ပွဲချိန် ၃၃ မိနစ်မှာ မာစီယဲလ်တို့က သွင်းယူပေးခဲ့ပြီး  ပထမပိုင်းမှာ ၃ ဂိုးပြတ် အနိုင်ရထားတာဖြစ်ပါတယ်။ ဒုတိယပိုင်း ၇၆ မိနစ်မှာ ပယ်လစ်ထရီက မန်ယူအတွက် အနိုင်ဂိုး ထပ်သွင်းခဲ့ပြီး နှစ်သင်းစလုံး ဂိုးထပ်မသွင်းနိုင်တော့ဘဲ မန်ယူအသင်းက ၄ ဂိုးပြတ် အနိုင်ရသွားတာပါ။

ပွဲထွက်လူစာရင်းမှာ မန်ယူအသင်းက မက်ဂွဲယား မပါတာကလွဲရင် အတောင့်တင်းဆုံး လူစာရင်းနဲ့ ပွဲထွက်ခဲ့ပြီး လီဗာပူးအသင်းက လူငယ်တွေနဲ့ တွဲဖက် ပွဲထွက်စေခဲ့တာပါ။

လီဗာပူးရဲ့ ပွဲထွက်လူစာရင်းက အတောင့်တင်းဆုံးအသင်း မဟုတ်ပေမဲ့လည်း အသင်းသားတွေရဲ့ အလားအလာကောင်းတွေကို မြင်တွေ့ခဲ့ရကြောင်း နည်းပြတန်ဟတ်ဂ်က မန်ယူအသင်းကို စတင်ကိုင်တွယ်ခဲ့တဲ့ ပထမဆုံးပွဲမှာ အနိုင်ရခဲ့ပြီးနောက် ပြောကြားသွားပါတယ်။

ဘောလုံးလုယူရာမှာ အမှားတချို့ရှိခဲ့ပြီး အခွင့်အရေးတချို့ ပေးခဲ့ရပေမဲ့ မိမိတို့ဘက်ကလည်း အသာရခဲ့ကြောင်း၊ ပထမဆုံးပွဲစဉ်နဲ့ ပတ်သက်လို့ ကျေနပ်ပြီး မိမိတို့မှာ ကောင်းမွန်တဲ့ ကစားသမားတွေရှိကာ အချိန်ကြာနိုင်ပေမဲ့ ဆက်လုပ်သွားရမှာဖြစ်ကြောင်း၊ ကောင်းမွန်တဲ့ အရာတွေလည်း မြင်တွေ့ရပြီး အလားအလာကောင်းတွေရှိကြောင်း နည်းပြတန်ဟတ်ဂ်က ပြောပါတယ်။

မန်ယူအသင်းဟာ ရာသီကြိုခြေစမ်းပွဲစဉ်တွေအနေနဲ့ သြစတြေးလျနိုင်ငံကို ဆက်လက်သွားရောက်ပြီး မဲလ်ဘုန်းဗစ်ထရီအသင်းနဲ့ ခြေစမ်းပွဲ ဆက်ပြီးကစားသွားမှာ ဖြစ်ပါတယ်။