ထိုင်းဝမ်အရေးနဲ့ပတ်သက်ပြီး အမေရိကန်သမ္မတ သမ္မတ ဘိုင်ဒင်နဲ့ တရုတ်ခေါင်းဆောင် ရှီကျင့်ဖျင်တို့ ဇူလိုင် ၂၈ ရက်က နှစ်နာရီကြာ ဆွေးနွေးခဲ့ကြတယ်လို့ အိမ်ဖြူတော်က ထုတ်ပြန်လိုက်ပါတယ်။

တရုတ်သမ္မတ ရှီက ထိုင်ဝမ်နဲ့ပတ်သက်လို့ မီးနဲ့မကစားဖို့ အမေရိကန်သမ္မတ ဂျိုးဘိုင်ဒင်ကို သတိပေးခဲ့တယ်လို့ တရုတ်နိုင်ငံခြားရေးဝန်ကြီးဌာနက သတင်းထုတ်ပြန်ပြီးနောက် အခုလို ဆွေးနွေးခဲ့တာပါ။

အမေရိကန် အောက်လွှတ်တော်ဥက္ကဋ္ဌ နန်စီ ပယ်လိုစီက တရုတ်ပိုင်လို့ အခိုင်အမာ ငြင်းဆိုနေတဲ့ ထိုင်ဝမ်ကျွန်းကို လာရောက်နိုင်ခြေရှိတဲ့အပေါ် ပေကျင်းရဲ့ စိုးရိမ်မှုတွေကိုလည်း မီးမောင်းထိုးပြလိုက်ပါတယ်။

ထိုင်ဝမ်အပေါ် အမေရိကန်ရဲ့ မူဝါဒ ပြောင်းလဲခြင်းမရှိကြောင်းနဲ့ လက်ရှိအနေအထားကို ပြောင်းလဲဖို့ တဖက်သတ်ကြိုးပမ်းမှုတွေ သို့မဟုတ် ထိုင်ဝမ်ရေလက်ကြားတလျှောက် ငြိမ်းချမ်းရေးနဲ့ တည်ငြိမ်ရေးကို ထိခိုက်စေတဲ့ ကိစ္စတွေကို ဝါရှင်တန်က ပြင်းပြင်းထန်ထန် ဆန့်ကျင်ကြောင်း ဘိုင်ဒင်က ရှီကို ပြောခဲ့ပါတယ်။

ဘိုင်ဒင်က ထိုင်ဝမ်အပေါ် ပွင့်လင်းတဲ့ ဆက်သွယ်ရေးလမ်းကြောင်းကို ထိန်းသိမ်းထားဖို့ အရေးကြီးကြောင်း အလေးပေးပြောကြားခဲ့ပြီး သမ္မတ ၂ ယောက်တို့ဟာ ရာသီဥတု ပြောင်းလဲမှု၊ ကျန်းမာရေးလုံခြုံမှုနဲ့ မူးယစ်ဆေးဝါးနှိမ်နင်းရေး အပါအဝင် ပူးပေါင်းဆောင်ရွက်ရေး နယ်ပယ်တွေကိုလည်း ဆွေးနွေးခဲ့ကြကြောင်း အိမ်ဖြူတော် သတင်းထုတ်ပြန်ရေးအရာရှိ ယော်န်ပီယာ့ရဲက ပြောပါတယ်။ သမ္မတ ၂ ယောက်ရဲ့ ဖုန်းပြောဆိုမှုဟာ နှစ်နာရီကျော် ကြာခဲ့ပါတယ်။

တရုတ်က ခုထိ ရှုတ်ချခြင်းမရှိသေးတဲ့ ယူကရိန်းကို ရုရှားရဲ့ကျူးကျော်မှု အပါအဝင် ကျယ်ပြန့်တဲ့ အစီအစဉ်တွေ ရှိမယ်လို့ အမေရိကန် အရာရှိတွေက ပြောပါတယ်။