ထိုင်းဝန်ကြီးချုပ်၊ ကာကွယ်ရေးဦးစီးချုပ် ဗိုလ်ချုပ်ကြီး ပရာယုဒ်ကျန်အိုးချားဟာ ဝန်ကြီးချုပ်အနေနဲ့ တိုင်းပြည်တာဝန်ထမ်းဆောင်လာတာဟာ ဩဂုတ် ၂၄  ရက်နေ့မှာ ၈ နှစ်တင်းတင်းပြည့်သွားပြီဖြစ်ပြီး ရာထူးကနေ နုတ်ထွက်ဖို့ ဘန်ကောက်မြို့မှာ ဒီနေ့ ဆန္ဒပြခဲ့ကြပါတယ်။

ထိုင်းနိုင်ငံ ဖွဲ့စည်းအုပ်ချုပ်ပုံဥပဒေအရ ဝန်ကြီးချုပ်ကို ၄ နှစ် ၁ ကြိမ် ရွေးချယ်တင်မြှောက်ရမှာဖြစ်ပြီး အဆိုပါဝန်ကြီးချုပ်ဟာ ၈ နှစ်ထက်ပို တာဝန်ထမ်းဆောင်ခွင့်မရှိဘူးလို့ ဖော်ပြထားပါတယ်။ 

အခုလို ရာထူးသက်တမ်းစေ့ဖို့ နာရီပိုင်းလောက်သာ လိုတော့ပေမယ့်လည်း ထိုင်းဝန်ကြီးချုပ်ဟာ နုတ်ထွက်မယ်လို့ တခွန်းတပါဒမှ မဟတဲ့အပြင် ဝန်ကြီးချုပ်ရဲ့ လုပ်လက်စအလုပ်တွေလည်း ပုံမှန်လုပ်ကိုင်နေဆဲ ဖြစ်ပါတယ်။ 

ဝန်ကြီးချုပ် နုတ်ထွက်ပေးဖို့ စစ်အာဏာရှင်ဆန့်ကျင်ရေးအဖွဲ့တွေက တစိုက်မတ်မတ် တောင်းဆို ဆန္ဒပြခဲ့သလို လက်ရှိ လွှတ်တော်ထဲရောက်နေတဲ့ အတိုက်အခံပါတီ ပြည်သူ့လွှတ်တော်ကိုယ်စားလှယ် ၁၇၂ ဦးကလည်း ရာထူးသက်တမ်းစေ့ ပရာယုဒ်ကျန်အိုးချား ဆက်လက်ခန့်ထားခြင်းမပြုရေး သုံးသပ်ဆုံးဖြတ်ပေးဖို့  လက်မှတ်ရေးထိုးပြီး  လွှတ်တော် ဥက္ကဋ္ဌ ချွန်းလိဖိုင်းမှတဆင့် အခြေခံဥပဒေတရားရုံးကို စာပို့ထားပါတယ်။ 

ဥက္ကဋ္ဌ ချွန်းလိဖိုင်းကလည်း အခြေခံဥပဒေတရားရုံးကို ဆက်လက်တင်ပြထားပြီး တရားရုံးရဲ့ ဆုံးဖြတ်ချက်အား စောင့်ဆိုင်းနေကြပါတယ်။ 

ထိုင်းတက္ကသိုလ်ပေါင်း ၁၈ ခုရှိ ဒီမိုကရေစီရေးလှုပ်ရှားသူတွေစုပေါင်းပြီး လူမှုကွန်ရက်ပေါ်မှာ သက်တမ်း ၈ နှစ်ပြည့် ဝန်ကြီးချုပ်အား ဆက်လက်လိုလားသူ/မလိုလားသူ  စစ်တမ်းကောက်ယူခဲ့ရာမှာ ၁ ရက်အတွင်း ပါဝင်ဆန္ဒပြုသူ ၃၇၄၀၆၃ ဦးရှိပြီး ၉၃.၁၇ ရာခိုင်နှုန်းက ဝန်ကြီးချုပ်ဆက်နေဖို့ မလိုလားဘဲ ၆.၈ ရာခိုင်နှုန်းကတော့ ဆက်နေဖို့ သဘောတူတယ်လို့ ဆိုပါတယ်။ ဒါကတော့ ပြည်သူ့စစ်တမ်းသက်သက်သာဖြစ်ပြီး တရား ဥပဒေအဆုံးအဖြတ်ထဲတော့ အကျုံးမဝင်ဘူးလို့ ဆိုပါတယ်။ 

ဒီကနေ့ ဘန်ကောက်မှာ ဝန်ကြီးချုပ်နုတ်ထွက်ရေး ဆန္ဒပြပွဲ အနည်းဆုံးနေရာပေါင်း ၅ ခုမှာရှိတယ်လို့ Thai PBS သတင်းမှာ ဖော်ပြပါတယ်။  

ပထမအုပ်စုဖြစ်တဲ့ ပြည်သူ့အခွင့်အရေးဆိုင်ရာ အလုပ်သမားကွန်ရက်အဖွဲ့ကတော့ အစိုးရအိမ်တော် ဂိတ်နံပါတ် ၄ ရှေ့မှာ ဒီနေ့မနက် သွားရောက်စုဝေးကာ “ တရားမဝင်အစိုးရ ရပ်ဆိုင်းသင့်ပြီ” ဆိုတဲ့ခေါင်းစဉ်နဲ့ ဝန်ကြီးချုပ်ပရယုဒ်လက်ထက် ကြုံတွေ့ရတဲ့ ကုန်ဈေးနှုန်းတက်ခြင်း၊ စက်သုံးဆီဈေးတက်ခြင်း စတဲ့ အထွေထွေပြဿနာတွေတင်ပြပြီး  အနိမ့်ဆုံးလုပ်အားခ တိုးမြှင့်ဖို့၊ ဝန်ကြီးချုပ်ပရယုဒ်ကျန်အိုးချား ချက်ချင်းနုတ်ထွက်ဖို့ တောင်းဆိုဆန္ဒပြခဲ့ကြပါတယ်။ 

ရမ်ခမ်းဟိုင် ဒီမိုကရေစီကွန်ရက်အဖွဲ့နဲ့ South Move On တို့ပူးပေါင်းထားတဲ့ ဒုတိယအုပ်စုကလည်း လွှတ်တော်အဆောက်အအုံရှေ့မှာ ဒီနေ့ညနေ ၃ နာရီလောက် စုဝေးကာ ပြဇာတ်တိုနဲ့ ဟောပြောပွဲကျင်းပနေပြီး ဝန်ကြီးချုပ်နုတ်ထွက်ရေး တောင်းဆိုလက်မှတ်ရေးထိုးထားကြတဲ့စာရင်းကို တင်ပြသွားမယ်လို့ ဆိုပါတယ်။ 

တတိယအုပ်စုမှာ လွတ်လပ်သောလူ့ဘောင်လို့ အမည်ရတဲ့အဖွဲ့က ချိုင်းဆမွန်ရဖွန်း ကျောက်တိုင်ရှေ့မှာ ကနေ့မနက် ၁၀ နာရီက လာရောက် စုဝေးပြီး ညနေ ၅ နာရီမှာ အစိုးရ အိမ်တော်ထိ စီတန်း လမ်းလျှောက်ဆန္ဒပြမှာဖြစ်ကြောင်း၊ အဓိကအားဖြင့် နိုင်ငံရေးအမြင်မတူ သူတွေကို နှိပ်ကွပ်အပြစ်ပေးတဲ့ ပုဒ်မ ၁၁၂ ကို ရုပ်သိမ်းဖို့နဲ့ ဝန်ကြီးချုပ်နုတ်ထွက်ရေး တောင်းဆိုမယ်လို့ ဆိုပါတယ်။ 

နံပါတ် ၄ အုပ်စုမှာ ရှပ်နီဆန္ဒပြခေါင်းဆောင်ဟောင်း နိုင်းကျဒူးဖွန်း နဲ့ နိုင်းနိတီထွန်းတို့ ဦးဆောင်ပြီး ပြည်သူ့ရင်ပြင်မှာ “ရပ် - ပရယုဒ် - ၈ နှစ် ” ဆိုတဲ့ခေါင်းစဉ်နဲ့ ဟောပြောမယ်လို့ ဆိုပါတယ်။ 

နံပါတ် ၅ အုပ်စုကတော့ အာဏာရှင်မလိုလားသောအဖွဲ့နဲ့ အာချီဝဖိထပ်လူထုအဖွဲ့တို့ပေါင်းပြီး ဒီမိုကရေစီအထိမ်းအမှတ်ကျောက်တိုင်ရှေ့မှာ စုဝေးကာ ရာ့ချ်ဒမ်းနိန်းကလန်ထိ ချီတက်လ မ်းလျှောက်ရင်း ပရာယုဒ်ကို မောင်းထုတ်မယ်လို့ ဆိုပါတယ်။ 

အခုလို ဝန်ကြီးချုပ်နုတ်ထွက်ရေး တောင်းဆိုနေတာနဲ့ပတ်သက်ပြီး အစိုးရအိမ်တော် ပြောရေး ဆိုခွင့်ရှိသူ နိုင်းဝိစနု ခေးငမ်းကတော့  ဝန်ကြီးချုပ်ဆက်နေရေး/မနေရေးမှာ အခြေခံဥပဒေတ ရားရုံးရဲ့ ခုံတရားသူကြီးဆုံးဖြတ်ချက်ပေါ်မူတည်ကြောင်း၊ တကယ်လို့ ဝန်ကြီးချုပ်ပရာယုဒ် နုတ်ထွက်သွားရင် စည်းမျဉ်းအရ ဒုဝန်ကြီးချုပ် ပရဝစ် ဝုန်းဆုဝမ်းက ဆက်လက်ဆက်ခံရမှာဖြစ်ကြောင်း၊ ဝန်ကြီးချုပ်ပရယုဒ်ဟာ ဝန်ကြီးချုပ်မလုပ်ရပေမယ့် သူ့ရဲ့ ကာကွယ်ရေးဦးစီးချုပ်ရာထူးဆက်ရှိနေသေးကြောင်း၊ ကာကွယ်ရေးဦးစီးချုပ်သက်တမ်းကို မကန့်သတ်ထားတဲ့အတွက် ဝန်ကြီးချုပ်ပရယုဒ်ဟာ အဆိုပါရာထူးမှာ ဆက်လက်တည်မြဲနေပြီး အစိုးရဝန်ကြီးများအဖွဲ့ထဲမှာလည်း ဆက်ပြီးပါဝင်နေဦးမှာပဲလို့ သတင်းထောက်တွေကို ပြောသွားပါတယ်။ 

ကိုးကား - news.thaipbs