မက္ကဆီကိုစီးတီးမှာ ရာနဲ့ချီတဲ့ တက်ကြွလှုပ်ရှားသူတွေဟာ ၂၀၁၄ ခုနှစ်အတွင်း ပျောက်ဆုံး သွားခဲ့တဲ့ ဆရာ၊ ဆရာမ ကောလိပ်ကျောင်းသား ၄၃ ဦးအတွက် တရားမျှတမှုရရေး သြဂုတ် ၂၆ ရက်က ဆန္ဒပြတောင်းဆိုခဲ့ကြပါတယ်။ 

ဆန္ဒပြသူတွေဟာ ပျောက်ဆုံး ကျောင်းသားတွေရဲ့ ဓာတ်ပုံတွေနဲ့ ပိုစတာတွေကို ကိုင်ဆောင်ပြီး ချီတက်ခဲ့ကြပါတယ်။ 

ပြီးခဲ့တဲ့ သီတင်းပတ်က ရှေ့နေချုပ်ဟောင်း Jesus Murillo ဟာ ကျောင်းသားတွေ ပျောက်ဆုံးမှုနဲ့ နောက်ဆက်တွဲ စုံစမ်းစစ်ဆေးမှုတွေ၊ တရားစီရင်ရေးတွေမှာ သူ့ရဲ့ပါဝင်ပတ်သက်မှုကြောင့် ဖမ်းဆီးခံခဲ့ရပြီးနောက်မှာ ချီတက်ပွဲ လုပ်ခဲ့တာပါ။ 

အဲဒီအချိန်က နိုင်ငံရဲ့ထိပ်တန်း အစိုးရရှေ့နေ Murillo ဟာ အနောက်တောင်ပိုင်း ဂွါရဲရိုပြည်နယ်မှာ အာရော့ထ်ဇီနပါကျေးလက်ဆရာများကောလိပ်မှ ကျောင်းသား ၄၃ ဦး ပျောက်ဆုံးသွားတဲ့ဖြစ်စဉ်နဲ့ ပတ်သက်ပြီး ပြင်းပြင်းထန်ထန် ဝေဖန်ခံရတဲ့ စုံစမ်းရေးကော်မရှင်ကို ကြီးကြပ်ခဲ့တာပါ။

ကျောင်းသားတွေကို ဒေသတွင်း မူးယစ်ဂိုဏ်းတစ်ခုမှ မှားယွင်းသတ်ဖြတ်ခဲ့ကြောင်း ကောက်ချက် ချခဲ့တဲ့ Murillo ရဲ့ စုံစမ်းစစ်ဆေးမှုဟာ မျက်မြင်သက်သေတွေကို ညှဉ်းပန်းနှိပ်စက်မှု အပါအဝင် အမှားအယွင်းတွေ၊ လွဲချော်မှုတွေနဲ့ ရှုပ်ထွေးနေတယ်လို့ နိုင်ငံတကာ ကျွမ်းကျင်သူတွေက ပြောကြားခဲ့ပါတယ်။ 

ပြီးခဲ့တဲ့သီတင်းပတ်က တရားသူကြီး တဦးဟာ ဒီအမှုနဲ့ပတ်သက်ပြီး ဖမ်းဝရမ်း ၁၀၀ နီးပါးကို ထုတ်ပြန်ခဲ့ပါတယ်။ ကျောင်းသား ၃ ဦးရဲ့အလောင်းကိုသာ အတိအကျ ဖော်ထုတ်နိုင်ခဲ့ပါတယ်။