ဂျပန်ဟာ ခရုဇ်ဒုံးကျည်တွေနဲ့ မြန်နှုံးမြင့် ပဲ့ထိန်းဒုံးကျည်တွေကို တီထွင်ပြီး အမြောက်အမြား ထုတ်လုပ်မယ်၊ ရုရှားနဲ့ တရုတ်ရဲ့ ခြိမ်းခြောက်မှုကို တန်ပြန်ဖို့ ရည်ရွယ်တဲ့ စစ်ရေးတိုးချဲ့မှု တစိတ်တပိုင်းအနေနဲ့ ပိုဝေးတဲ့ ပစ်မှတ်တွေကို တိုက်ခိုက်နိုင်စွမ်းရှိဖို့ ကြိုးပမ်းနေတယ်လို့ သြဂုတ် ၃၁ မှာ ပြောလိုက်ပါတယ်။

ကာကွယ်ရေးဝန်ကြီးဌာနရဲ့ နှစ်စဉ် ဘတ်ဂျက်တောင်းခံမှုမှာ ထုတ်ဖော်ပြသခဲ့တဲ့ ဝယ်ယူရေး အစီအစဉ်အရ ဂျပန်ရဲ့ ဖွဲ့စည်းပုံမှာ ကာကွယ်ရေးတပ်ဖွဲ့တွေအပေါ် ဆယ်စုနှစ်ချီ ကန့်သတ်ချက်ကနေ ရှင်းရှင်းလင်းလင်း ကျောခိုင်းလိုက်တာလို့လည်း ပြောပါတယ်။

ဘတ်ဂျက်တောင်းခံရာမှာ မြေပြင်ပစ်လွှတ်တဲ့ ခရုဇ်ဒုံးကျည်တွေ အမြောက်အမြား ထုတ်လုပ်ဖို့ ရန်ပုံငွေ တောင်းခံထားပြီး သင်္ဘောတွေနဲ့ မြေပြင်ပစ်မှတ်တွေကို ထိမှန်နိုင်တဲ့ အလျင်အမြန် လျှောတိုက်နိုင်တဲ့ ပဲ့ထိန်းဒုံးကျည်တွေ အများအပြား ထုတ်လုပ်ဖို့ ရန်ပုံငွေကိုလည်း တောင်းခံထားပါတယ်။

ဝန်ကြီးဌာနဟာ အသံထက်မြန်တဲ့ ထိပ်ဖူးတွေလို တခြားဒုံးကျည်တွေကို တီထွင်ဖို့လည်း ငွေရှာနေပါတယ်။ ဒါပေမဲ့ အဆိုပြုထားတဲ့ လက်နက်တွေအတွက် ပစ်နိုင်တဲ့ အကွာအဝေးကို အတိအကျ မပြောသလို ဘယ်လောက်အထိ ဖြန့်ကြက်ဖို့ စီစဉ်ထားတယ် ဆိုတာကိုလည်း မပြောခဲ့ပါဘူး။

လောလောဆယ်မှာတော့ ဂျပန်ဒုံးကျည်တွေက ကီလိုမီတာ ရာဂဏန်း အကွာအဝေးကိုသာ ပစ်လွှတ်နိုင်တယ်လို့ ဆိုပါတယ်။

အမေရိကန် အောက်လွှတ်တော်ဥက္ကဋ္ဌ နန်စီပေလိုစီ ထိုင်ဝမ်ကို သွားအပြီး တရုတ်က အင်အားပြတဲ့အနေနဲ့ ဂျပန်ကနေ ကီလိုမီတာ ၁၆၀ (မိုင် ၁၀၀) အောက် အကွာအဝေးမှာရှိတဲ့ ရေပြင်ထဲကို ပဲ့ထိန်းဒုံးကျည်ငါးစင်း ပစ်လွှတ်ခဲ့ပြီးနောက် တရုတ်ရဲ့ ဒေသတွင်း ရည်မှန်းချက်တွေ နိုးကြားလာခဲ့ပါတယ်။