ဇာပိုရစ်ချ်ဇီယာ နျူကလီးယား ဓာတ်အားပေးစက်ရုံ အနီးအနားမှာ ပစ်ခတ်မှုတွေ ရှိခဲ့တာကြောင့် ဓာတ်ရောင်ခြည် ဘေးအန္တရာယ်ကို ကြောက်ရွံ့မှုတွေ ဖြစ်ပေါ်ခဲ့ကြပြီးနောက် အပျက်အစီးတွေကို စစ်ဆေးဖို့ နိုင်ငံတကာ အဏုမြူစွမ်းအင်အေဂျင်စီ (IAEA) အဖွဲ့ဟာ ယူကရိန်းနိုင်ငံ မြို့တော်ကနေ ဇာပိုရစ်ချ်ဇီယာစက်ရုံကို သြဂုတ် ၃၁ ရက်မှာ ထွက်ခွာခဲ့ပါတယ်။

ဒီမစ်ရှင်ကို IAEA အကြီးအကဲ Rafael Grossi က ဦးဆောင်ခဲ့ပြီး IAEA အဖွဲ့ဟာ ကိယက်ဗ်မြို့ကနေ ယာဉ်တန်းနဲ့ ထွက်ခွာလာပါတယ်။

“ဒီမစ်ရှင်အတွက် များပြားလှတဲ့ ဆွေးနွေးမှုတွေ ပြုလုပ်ခဲ့ရပြီး ၆ လကြာ ပြင်းပြင်းထန်ထန် ကြိုးပမ်းပြီးနောက်မှာတော့ အခုနောက်ဆုံး ကျနော်တို့ လှုပ်ရှားနေပါပြီ” လို့ Grossi က သတင်းထောက်တွေကို ပြောကြားပါတယ်။

မစ်ရှင်ဟာ စက်ရုံဆိုက်မှာ ရက်အနည်းငယ်ကြာ ရှိနေဖို့ စီစဉ်ထားကြောင်းလည်း ပြောပါတယ်။ အဲဒီမှာ အလွန်အရေးကြီးတဲ့ တာဝန်တခု ဆောင်ရွက်ဖို့ရှိပြီး အဲဒီက အခြေအနေမှန်ကို အကဲဖြတ်ဖို့နဲ့ အခြေအနေကို တတ်နိုင်သမျှ တည်ငြိမ်အောင် ကူညီပေးဖို့ဖြစ်ကြောင်း သူက ဆိုပါတယ်။

“ကျနော်တို့ စစ်ပွဲဇုန်ကို သိမ်းပိုက်ထားတဲ့ နယ်မြေကို သွားရတော့မယ်။ ဒီအတွက် ရုရှားဖက်ဒရေးရှင်းကတင် မကဘဲ ယူကရိန်းဆီကပါ ပြတ်သားတဲ့ အာမခံချက်တွေ လိုအပ်ပြီး အခုတော့ အာမခံနိုင်ပါပြီ” လို့ Grossi က ပြောကြားခဲ့ပါတယ်။

ယူကရိန်း နည်းပညာရှင်တွေ လည်ပတ်နေတဲ့ စက်ရုံမှာ အမြဲတမ်းမစ်ရှင်တခု တည်ထောင်ဖို့ IAEA က မျှော်လင့်ထားကြောင်းလည်း ပြောပါတယ်။

အမေရိကန်ကတော့ စက်ရုံကို လုံးဝပိတ်ပစ်ဖို့ တိုက်တွန်းထားပြီး အဲဒီအနီးတဝိုက်မှာ စစ်မဲ့ဇုန်တခုလုပ်ဖို့ တောင်းဆိုထားပါတယ်။

IAEA အဖွဲ့ဟာ ဥရောပရဲ့ အကြီးဆုံး နျူကလီးယားစက်ရုံကို ဘယ်အချိန်မှာ ရောက်ရှိစစ်ဆေးမယ် ဆိုတာကို ရှင်းရှင်းလင်းလင်း မသိရသေးပါဘူး။

မကြာသေးမီ ရက်တွေအတွင်းကတော့ ရုရှားနဲ့ ယူကရိန်း နှစ်ဖက်စလုံး နျူကလီးယားစက်ရုံ အနီးတဝိုက်မှာ ပုံမှန်ပစ်ခတ်မှု ရှိခဲ့ကြောင်း သိရပါတယ်။