အမေရိကန်သမ္မတ ဂျိုးဘိုင်ဒင်က  သမ္မတဟောင်း ဒေါ်နယ်လ်ထရမ့်ပ်နဲ့ ရီပတ်ဘလစ်ကန် မဟာမိတ်တွေကို နိုင်ငံရဲ့ ဒီမိုကရေစီကို ထိခိုက်စေတယ်လို့ စွပ်စွဲပြောကြားလိုက်ပြီး မဲဆန္ဒရှင်တွေကိုလည်း နိုဝင်ဘာလ ကြားဖြတ်ရွေးကောက်ပွဲတွေ မတိုင်ခင် အစွန်းရောက်ဝါဒကို ပယ်ချဖို့လည်း စက်တင်ဘာ ၁ ရက်က တိုက်တွန်းခဲ့ပါတယ်။

လွှတ်တော်အမတ်တွေနဲ့ သမ္မတဟောင်း ထရမ့်ပ် ဦးဆောင်တဲ့ (MAGA) အစီအစဉ်ကို နှစ်သက်ထောက်ခံသူတွေဟာ ဒီမိုကရေစီ ရွေးကောက်ပွဲတွေကို မှောက်လှန်လိုတဲ့ ဆန္ဒရှိပြီး ဖွဲ့စည်းပုံအခြေခံဥပဒေကိုလည်း လျစ်လျူရှုတဲ့အပြင် ကိုယ်ဝန်ဖျက်ချခွင့်၊ ကိုယ်ရေးကိုယ်တာ လွတ်လပ်ခွင့်၊ သန္ဓေတားခွင့် ဒါမှမဟုတ် လိင်တူလက်ထပ်ခွင့်တွေ မရှိတဲ့အချိန်တွေဆီ နိုင်ငံကို နောက်ပြန်ဆုတ်ချင်နေတာလို့ ဘိုင်ဒင်က ပြောပါတယ်။

“ဒေါ်နယ်ထရမ့်ပ်နဲ့ မာဂါ ရီပတ်ဘလစ်ကန်တွေက ငါတို့သမ္မတနိုင်ငံရဲ့ အခြေခံ အုတ်မြစ်တွေကို ခြိမ်းခြောက်နေတဲ့ အစွန်းရောက်ဝါဒကို ကိုယ်စားပြုနေတယ်” လို့ ဘိုင်ဒင်က ပြောကြားခဲ့ပါတယ်။

ဘိုင်ဒင်ဟာ ဒီမိန့်ခွန်းကို အမေရိကန် ဒီမိုကရေစီကို မွေးဖွားရာ ဖီလာဒဲလ်ဖီးယားက လွတ်လပ်ရေးခန်းမအနီး ကျည်ကာမှန်တွေရဲ့အနောက်မှာ ပြောကြားခဲ့တာဖြစ်ပြီး ထရမ့်ပ်ကို ထောက်ခံတဲ့ ဆန္ဒပြသူတွေကလည်း အော်ဟစ်နေခဲ့ကြပါတယ်။

သမ္မတ ဘိုင်ဒင်က နိုင်ငံရေးအကြမ်းဖက်မှုကို ရှုတ်ချထားပြီး နှစ်ဖက်ပါတီတွေ အပေးအယူ လုပ်ကြဖို့လည်း တိုက်တွန်းလိုက်ပါတယ်။

သူ့ရဲ့လက်ထောက်တွေကတော့ သမ္မတဟာ ရီပတ်ဘလစ်ကန်ပါတီထဲက ဒီမိုကရေစီ ဆန့်ကျင်ရေး လမ်းကြောင်းတွေကို ပိုမိုစိုးရိမ်လာတဲ့အတွက် ဒီနှစ်ရွေးကောက်ပွဲမှာ ဝင်ရောက်ယှဉ်ပြိုင်ဖို့ လိုနေပြီးတော့ ၂၀၂၄ ရွေးကောက်ပွဲမှာ ပြန်ရွေးချယ်ဖို့ လိုအပ်နေပြီလို့ ရှုမြင်ကြောင်း ပြောကြားပါတယ်။