မြောက်အတ္တလန္တိတ်စာချုပ်အဖွဲ့ (နေတိုး) ဟာ ဖင်လန်နဲ့ ဆွီဒင်တို့မှာ အခြေစိုက်စခန်းတွေ ထူထောင်မယ်ဆိုရင် ရုရှားက နိုင်ငံအနောက်မြောက်ပိုင်းမှာ သူ့ရဲ့စစ်ရေးအင်အားကို မြှင့်တင်သွားမယ်လို့ ရုရှားနိုင်ငံခြားရေးဝန်ကြီး ဆာဂီလာ့ဗရော့ဗ်က စက်တင်ဘာ ၁ ရက်မှာ ပြောပါတယ်။

ဖင်လန်နဲ့ ဆွီဒင်ပိုင် နယ်နိမိတ်တွေမှာ နေတိုးတပ်တွေကို ဖြန့်ကြက်နေရာချမှု ဒါမှမဟုတ် စစ်အခြေစိုက်စခန်းတွေကို ထူထောင်ဖို့ ဆုံးဖြတ်လိုက်တာနဲ့ တပြိုင်နက် ရုရှားအနေနဲ့ အမေရိကန်က ချုပ်ကိုင်ထားမယ်လို့ ယူဆပြီးတော့ နိုင်ငံအနောက်မြောက်ပိုင်း ဒေသတွေမှာ သူ့ရဲ့လက်နက်ကိုင်တပ်ဖွဲ့တွေကို တိုးမြှင့်ချထားသွားမယ်လို့ မော်စကိုမှာကျင်းပတဲ့ အခမ်းအနားမှာ မိန့်ခွန်းမှာ လာ့ဗရော့ဗ်က မှတ်ချက်ပြုခဲ့တာပါ။

ဖင်လန်ဟာ ရုရှားနဲ့ ကီလိုမီတာ ၁,၃၀၀ ကျော် နယ်နိမိတ်ထိစပ်ပြီး အီးယူအဖွဲ့ဝင်တွေထဲမှာ အရှည်ဆုံးဖြစ်ပါတယ်။

ဖင်လန်နဲ့ ဆွီဒင်တို့ဟာ ဖေဖော်ဝါရီနှောင်းပိုင်းမှာ ရုရှား-ယူကရိန်း ပဋိပက္ခ ဖြစ်ပွားပြီးနောက် နေတိုးအဖွဲ့ကိုပူးပေါင်းဖို့ ဆုံးဖြတ်ခဲ့ပြီး မေလ ၁၈ ရက်မှာ နေတိုးအဖွဲ့ဝင်အဖြစ် လျှောက်လွှာတင်ခဲ့ကြပါတယ်။

နော်ဒစ်နိုင်ငံ ၂ နိုင်ငံဟာ ဇူလိုင် ၅ ရက်မှာ ဘရပ်ဆဲလ်ရှိ နေတိုးဌာနချုပ်မှာ လက်မှတ်ရေးထိုးခဲ့ပြီး မဟာမိတ်အဖွဲ့ရဲ့ အပြည့်အဝ အဖွဲ့ဝင်တွေဖြစ်လာရေး လုပ်ငန်းစဉ်ကို တရားဝင် စတင်ခဲ့ပါတယ်။

အဲဒီ ၂ နိုင်ငံမှာ နေတိုးရဲ့ စစ်ရေးဆိုင်ရာ အခြေခံအဆောက်အအုံတွေ တည်ထောင်မယ်ဆိုရင် တူညီတဲ့ တုံ့ပြန်မှုကို လုပ်ဆောင်သွားမယ်လို့ ရုရှားက ထပ်ခါတလဲလဲ ပြောကြားထားပါတယ်။