မနေ့ညကကန်သွားတဲ့ မန်ယူအသင်းနဲ့ ပွဲစဉ်မှာ ပွဲကိုထိန်းချုပ်ကစားနိုင်ခဲ့လို့ အနိုင်ရရှိခဲ့သင့်တယ်လို့ အာဆင်နယ်နည်းပြ အာတီတာကပြောပါတယ်။

အာဆင်နယ်အသင်းဟာ အိုးထရတ်ဖို့ဒ်ကွင်းမှာ မန်ယူကို ၃ ဂိုး ၁ ဂိုးနဲ့ရှုုံးနိမ့်ခဲ့ပေမဲ့ နည်းပြအာတီတာကတော့ နိုင်ပွဲရရှိသင့်ကြောင်း ပွဲအပြီးမှာ မှတ်ချက်ပေးခဲ့တာပါ။

အဲဒီပွဲမှာ အာဆင်နယ်က ဘောလုံးပိုင်ဆိုင်မှု ၆၀ ရာခိုင်နူန်းနဲ့ ဂိုးပေါက်ကန်သွင်းချက် ၁၆ ကြိမ်ရှိခဲ့ပေမဲ့ တဂိုးသာသွင်းယူနိုင်ခဲ့ပြီး ကန်သွင်းချက် ၁၀ ကြိမ်ရှိခဲ့တဲ့ မန်ယူအသင်းက ၃ ဂိုး သွင်းယူနိုင်ခဲ့တာပါ။

နည်းပြအာတီတာက “ကျနော်တို့ကစားပြခဲ့တဲ့ နည်းလမ်းအရဆိုရင် ရှုံးပွဲက အတော်လေး စိတ်ပျက်စရာပါ။ ကျနော်တို့ ပွဲကိုထိန်းချုပ်နိုင်ခဲ့ပြီး အခွင့်အရေးတွေလည်း တစ်ကြိမ်ပြီးတစ်ကြိမ်ရခဲ့ပေမယ့် အသုံးမချနိုင်ခဲ့ဘူး။ သူတို့က အပိုင်အခွင့်အရေး သုံးကြိမ်ကနေ သုံးဂိုးသွင်းသွားတယ်။ ကျနော်တို့ ပြသခဲ့တဲ့စွမ်းဆောင်ရည်အရဆိုရင် နိုင်ပွဲရသင့်ပါတယ်” လို့ ပြောပါတယ်။

ဒီပွဲအပြီး အာဆင်နယ်အသင်းဟာ ၅ ပွဲဆက်အနိုင်ရလဒ် ရပ်တန့်သွားပြီး အခုနှစ်ရာသီမှာ  ပထမဆုံးရှုံးပွဲတွေ့ခဲ့ပေမဲ့  အမှတ်ပေးဇယားအဆင့် ၁ မှာ ဆက်လက်ရပ်တည်နေပါတယ်။