အာဆင်နယ်ကွင်းလယ်ကစားသမားသုံးယောက်ဟာ ဒဏ်ရာပြဿနာကြောင့် အခုသီတင်းပတ် မန်ယူအသင်းနဲ့ကန်မယ့်ပွဲမှာ ပါဝင်နိုင်ဖို့ အခက်အခဲရှိနေပါတယ်။

ကွင်းလယ်လူ သောမက်စ်ပါတေးနဲ့ အယ်လ်နန်နီတို့ဟာ ဒဏ်ရာပြဿနာတွေကြောင့် အက်စတန်ဗီလာကို အနိုင်ရတဲ့ပွဲကိုလွဲချော်ခဲ့ပါတယ်။

အဲဒီပွဲစဉ်မှာ အသင်းခေါင်းဆောင် အိုဒီဂတ်ဟာလည်း ခြေထောက်ဒဏ်ရာကြောင့် နာကျင်မှုဝေဒနာခံစားခဲ့ရလို့ ဆေးစစ်မှုတွေပြုလုပ်ဖို့လိုနေပါတယ်။

အလားတူ နောက်ခံလူ ဇင်ချန်ကိုက သေချာပေါက်လွဲချော်မှာဖြစ်သလို ဂိုးသမား အာရွန်ရမ်စ်ဒေးတို့ဟာလည်း ဒဏ်ရာပြဿနာရှိနေလို့ ပါဝင်ဖို့ မသေချာသေးကြောင်းနည်းပြ အာတီတာကပြောပါတယ်။

အာဆင်နယ်အသင်းဟာ ကွင်းလယ်လူတွေဒဏ်ရာရနေတာ ကြောင့် အပြောင်းအရွှေ့နောက်ဆုံးနေ့မှာ ဗီလာကွင်းလယ်လူ ဒေါက်ဂလပ်လူးဝစ်ကို သုံးကြိမ်တိုင်တိုင် ကမ်းလှမ်းခဲ့ပေမယ့် ပယ်ချခံခဲ့ရတာဖြစ်ပါတယ်။

မန်ယူနိုက်တက်က အကြီးမားဆုံးပြိုင်ဘက် အသင်းဖြစ်ပေမဲ့ အရင်က အနိုင်ယူခဲ့ဖူးသလို နိုင်ပွဲထပ်ယူဖို့လည်း ပြင်ဆင်သွားမယ်လို့ နည်းပြအာတီတာက ပြောသွားပါတယ်။