၂၀၂၂−၂၀၂၃ လက်ရှိ ကြံခုတ်ရာသီအတွက် သကြားစက်ရုံတွေက  ကြံတန်ချိန် တစ်တန်ကို ငွေကျပ် ၉၀,၀၀၀ အထိ ဈေးဖွင့်ထားကြပါတယ်။

ရှမ်းပြည်နယ်မြောက်ပိုင်း မိုင်းရယ်သကြားစက်ရုံနဲ့ ငွေရည်ပုလဲသကြားစက်ရုံတို့က ကြံ တစ်တန်ကို ကျပ် ၉၀,၀၀၀ ဈေးနှုန်းနဲ့ဝယ်ယူမယ်လို့ တောင်သူတွေကို မကြာသေးခင်က အသိပေး ကြေညာထားတာပါ။

ပြီးခဲ့တဲ့ ၂၀၂၁-၂၀၂၂  ခုနှစ်  ကြံရာသီမှာ သကြားစက်ရုံတွေက ကြံတစ်တန်ကို ၆၅,၀၀၀ ကျပ်သာ သတ်မှတ်ပေးခဲ့ပေမဲ့ အခုနှစ်မှာ သကြားဈေးနှုန်း မြင့်တက်နေတာ၊ တောင်သူတွေ ရင်ဆိုင်နေရတဲ့ သွင်းအားစုစရိတ် ကြီးမြင့်နေတာတွေကြောင့် ခုလိုဈေးနှုန်းတိုးမြှင့်ဝယ်ယူလာတာဖြစ်တယ်လို့ ကြံ၊ သကြားလုပ်ငန်းရှင်တွေထံက သိရပါတယ်။

အောင်လံဒေသခံ သကြားစိုက်တောင်သူတစ်ဦးက “သကြားစက်ရုံတိုင်းက အဲဒီဈေးမပေးဘူး။ ဒီနှစ် ကြံဈေးမြှင့်ပေးမယ်ဆိုလည်း မြေသြဇာဈေးက လိုက်တက်နေတာ။ အခုတောင် တစ်အိတ်ကို ၁ သိန်းကျော်တယ်။ ပြီးတော့ စက်သုံးဆီဈေး၊ မျိုးဈေး၊ ကားခ၊ ခုတ်တင်ခ အကုန်တက်နေတာ။ အခုနှစ်တော့ စက်ရုံတွေက တောင်သူကို ဈေးပေးလို့ရသလောက် ပေးစေချင်တယ်” လို့ ပြောပါတယ်။

အခုနှစ်က သကြားဈေးကောင်းပေမဲ့  မြေဆီဈေးနှုန်း၊ စက်သုံးဆီဈေးနှုန်း စတဲ့ သွင်းအားစုစရိတ်တွေက အဆမတန်မြင့်တက်နေတာကြောင့် သကြားစက်ရုံတွေက ကြံ ၁ တန် ဈေးနှုန်းကို ပေးနိုင်သလောက် တိုးမြှင့်ပေးဖို့အတွက် ကြံစိုက်တောင်သူတွေက မျှော်လင့်နေကြတာပါ။

အခုနှစ် ပြည်တွင်းသကြားဈေးကတော့  ဈေးကွက်မှာ လက်ကျန်နည်းနေတာ၊ ပြည်ပနိုင်ငံတွေက သကြား ၀င်ရောက်မှုမရှိတာကြောင့် ၄ နှစ်အတွင်း အမြင့်ဆုံးဈေးကို ရောက်ရှိနေတယ်လို့ သိရပါတယ်။ 

ပြီးခဲ့တဲ့ ၂၀၁၉−၂၀၂၀ ရာသီမှာ သကြား ၁ ပိဿာဈေးနှုန်းက ကျပ် ၁၀၀၀ အောက်မှာပဲရှိခဲ့ပြီး၊ အခုနှစ်မှာ ၁ ပိဿာကို ကျပ် ၂၂၅၀ ထိ စံချိန်တင် မြင့်တက်နေတာပါ။

သကြားဈေးကောင်းတဲ့အတွက် နောက်လာမယ့် ၂၀၂၃ -၂၀၂၄ ကြံရာသီမှာ ကြံစိုက်ဧက တိုးတက်လာဖို့ သကြားစက်ရုံပိုင်ရှင်တွေက ကြံစိုက်တောင်သူတွေကို စိုက်ပျိုးစရိတ်ချေးငွေတွေ ထုတ်ချေးပေးနေတယ်လို့လည်း သိရပါတယ်။

မြန်မာနိုင်ငံမှာ သကြားထွက်ရှိတဲ့ ပမာဏက တစ်နှစ်ကို တန်ချိန် ၃ သိန်းကနေ  ၅ သိန်းကျော် အထိရှိပါတယ်။ အခုဘဏ္ဍာနှစ်အတွင်းမှာ  ဗီယက်နမ်နိုင်ငံကို သကြားတန်ချိန် ၃၀,၀၀၀ ကျော် တင်ပို့ထားတယ်လို့ သိရပါတယ်။မြန်မာနိုင်ငံမှာ ကြံသီးနှံကို ရှမ်းပြည်နယ်နဲ့ စစ်ကိုင်းတိုင်းတို့မှာ အများဆုံး စိုက်ပျိုးပြီးတော့ ပဲခူးတိုင်းနဲ့ မန္တလေးတိုင်းတို့မှာလည်း အထိုက်အလျောက် စိုက်ပျိုးပါတယ်။