မွန်ပြည်နယ်၊ ရေးမြို့လယ်က ရေးခရိုင်တရားရုံးကို စက်တင်ဘာ ၉ ရက် မနက် ၁၁ နာရီ ၄၅ မိနစ်က ၄၀ မမ ဗုံးပစ်လောင်ချာနဲ့ ထပ်မံပစ်ခတ်ခဲ့တယ်လို့ ရေးဘီလူးအဖွဲ့ တာဝန်ရှိသူက ပြောပါတယ်။

ခရိုင်တရားရုံးထဲက ခရိုင်အုပ်ချုပ်ရေးမှူး ဦးဆန်းမင်း နေတဲ့နေရာကို ပစ်ခတ်ခဲ့တာဖြစ်ပြီး မကြာသေးတဲ့ရက်က ရေး PDF တွေကို အရှင်ဖမ်းပြမယ်ဆိုပြီး စိန်ခေါ်ခဲ့တာကြောင့် အခုလို လုပ်တာဖြစ်တယ်လို့ သူက ပြောပါတယ်။

ဒေသခံတယောက်က “အခုလည်း ပေါက်ကွဲသံက ကျယ်လောင်တယ်။ ရုံးမှာ လူထိခိုက်သေဆုံးမှု ရှိ၊ မရှိတော့ မသိရသေးဘူး။ မြို့တွင်းလုံခြုံရေး တင်းကျပ်လိုက်တယ်” လို့ ပြောပါတယ်။

မနေ့ညနေကလည်း အဲဒီခရိုင်တရားရုံးကို နောက်ဆုံးသတိပေးတဲ့အနေနဲ့ ၆၀ မမ ဗုံးသီးနဲ့ လုပ်ထားတဲ့မိုင်းနဲ့ တိုက်ခိုက်ခဲ့ပြီး စစ်ရေးအရှိန်မြှင့် တိုက်ခိုက်သွားမယ်လို့ ရေးပြည်သူ့ကာကွယ်ရေး အထူးအဖွဲ့က ထုတ်ပြန်ထားပါတယ်။

ရေးမြို့နယ်ခရိုင်တရားရုံးကို စက်တင်ဘာ ၁ ရက်က စတင်ဖွင့်လှစ်ခဲ့ပြီး အခုညနဲ့ ဒီမနက်မှာ ၂ ကြိမ်ဆက်တိုက် တိုက်ခိုက်ခံရတာပါ။

ရုံး၊ ဌာနတွေနား ဒေသခံတွေ မသွားကြဖို့နဲ့ ထပ်မံတိုက်တွန်းထားပြီး ဩဂုတ် ၃ ရက်ကလည်း လဝကရုံးကို ရေးဘီလူးအဖွဲ့က တိုက်ခိုက်ခဲ့ပါတယ်။