လက်ဘနွန်နိုင်ငံမှာ ဘဏ်ထဲငွေစုငွေသွင်း လုပ်ထားသူတွေဟာ ဘဏ်စနစ်ထဲမှာ ရပ်တန့်ခံထားရတဲ့ သူတို့ ငွေတွေပြန်ရဖို့ စက်တင်ဘာ ၁၆ ရက်မှာ လက်ဘနွန်ဘဏ် ၅ ခုကို ဝိုင်းရံစီးနင်းထားပါတယ်။ 

စီးပွားရေးဘဏ်တွေဟာ လွန်ခဲ့တဲ့ ၃ နှစ်လောက်က စီးပွားရေးအကျပ်အတည်း စဖြစ်ကတည်းက ငွေအပ်သူအများစုရဲ့ စုဆောင်းငွေတွေကို ပိတ်ထားခဲ့တာဖြစ်ပြီး လူဦးရေ အများစုကိုလည်း အခြေခံလစာ မပေးနိုင်တော့ဘဲ စက်တင်ဘာ ၁၄ ရက်ကတည်းက လက်ဘနွန်မှာ ဘဏ် ၇ ခုကို စီးနင်းခဲ့ကြတာပါ။ 

စက်တင်ဘာ ၁၆ ရက်မနက်က လက်နက်ကိုင်အမျိုးသား အာဘက်ဒ်ဆိုဘရာဟာ မြို့တော် တာရစ်ခ် ဂျယ်ဒစ်ဒါ ရပ်ကွက်ရှိ BLOM ဘဏ်ထဲကို ဝင်လာပြီး သူ့စု‌ဆောင်းငွေကို ထုတ်ပေးဖို့ တောင်းခဲ့ကြောင်း ဘဏ်က ရိုက်တာကို ပြောပါတယ်။ 

နောက်ပိုင်းမှာ သူ့သေနတ်တွေကို လုံခြုံရေးတပ်ဖွဲ့တွေဆီ ပေးအပ်ခဲ့ပေမယ့် နေဝင်တဲ့အထိ ဘဏ်ထဲမှာ သော့ခတ်နေခဲ့ပြီးတော့ သူ စုဆောင်းထားတဲ့ ဒေါ်လာ ၃ သိန်းကို ငွေသားနဲ့ထုတ်ယူဖို့ ဘဏ်တာဝန်ရှိသူတွေနဲ့ ညှိနှိုင်းခဲ့တယ်လို့ ပြောပါတယ်။ 

ဆိုဘရာဟာ နောက်ဆုံးမှာ ဩဇာညောင်းသော ရှိတ်ခ် တဦးရဲ့ ညှိနှိုင်းဖြေရှင်းမှုကြောင့် ဘာငွေမှ မရခဲ့ဘဲ ဘဏ်မှ ထွက်ခွာသွားခဲ့ကြောင်း ပြည်တွင်းမီဒီယာတွေက ဖော်ပြခဲ့ပါတယ်။ သူ့ကိုဖမ်းဆီးထိန်းသိမ်းခြင်း မရှိပါဘူး။ လုံခြုံရေးစိုးရိမ်မှုများကြောင့် လက်ဘနွန်ဘဏ်များအသင်းက လာမယ့် သီတင်းပတ်မှာ ၃ ရက်ကြာ ပိတ်ထားမယ်လို့ ကြေညာခဲ့ပြီး အကျပ်အတည်းကို ကိုင်တွယ်ဖြေရှင်းဖို့အတွက် ဥပဒေတွေပြဋ္ဌာန်းဖို့ အစိုးရကို တိုက်တွန်းခဲ့ပါတယ်။ 

စက်တင်ဘာ ၁၆ ရက်က ဘဏ်တွေကို ဝင်ရောက်စီးနင်းပြီး သူတို့ငွေသူတို့ ပြန်တောင်းဆိုကြသူ တွေထဲက အဖမ်းခံရမှု ၄ မှု ရှိခဲ့ပါတယ်။