ဆုံးရှုံးမှုငွေပမာဏာ ဘတ်သန်းပေါင်း ၁၃၀၀၀ ကျော်၊ နစ်နာသူပေါင်း ၉၈၀၀ ကျော်ရှိခဲ့တဲ့ ထိုင်းနိုင်ငံက Forex 3D ရင်းနှီးမြှုပ်နှံမှုငွေကစားကွက် ကွန်ရက်ထဲမှာ ထိုင်း ထိပ်တန်းရုပ်ရှင်မင်းသမီး ဖဲင်ကိဆာဝိကာနဲ့တကွ သူ့မိသားစုဝင်တွေ အဖမ်းခံရပြီးတဲ့နောက် ပါဝင်ပတ်သက်သူတွေရဲ့ အမည်တွေကို သက်ဆိုင်ရာက ဆက်လက်ဖော်ထုတ်နေရာမှာ ထိုင်းအနုပညာရှင်နဲ့ တေးသံရှင်အချို့အမည်တွေပါ နောက်ထပ်ပါဝင်လာပါတယ်။ 

ဒီစက်တင်ဘာလတွင်း နောက်ထပ်အမှုရင်ဆိုင်နေရသူကတော့ ထိုင်းထိပ်တန်း အမျိုးသမီး အဆိုတော်  ဘိုင်ဒွေနဲ့  သူရဲ့ခင်ပွန်း အစီအစဉ်တင်ဆက်သူ DJ မဲန်းတို့ပဲ ဖြစ်ပါတယ်။ 

သူတို့ဟာ Forex 3D မန်နေဂျာနဲ့ လွန်စွာရင်းနှီးသူတွေဖြစ်ပြီး လွန်ခဲ့တဲ့ ၂ နှစ်ကျော်က သူတို့မင်္ဂလာပွဲကို ဘတ် ၅ သန်း အကုန်ကျခံပြီး ကြီးကျယ်ခမ်းနားစွာကျင်းပခဲ့သလို သတို့သားဘက်က သတို့သမီးကို ဘတ် သန်းပေါင်း ၆၀ တင်တောင်းခဲ့ပါတယ်။

အဲဒီနောက်ပိုင်း ဘတ်သန်းပေါင်း ၅၀ တန် နေအိမ်ဝယ်ယူကာ ဇိမ်ခံကားတွေ၊  ဘတ်သိန်းချီတန်တဲ့ လက်ပွေ့အိတ်၊ ဖိနပ်၊ အားကစားပစ္စည်း စတာတွေကို သုံးဖြုန်းခဲ့ ပါတယ်။ သာမန်မျိုးရိုးစဉ်ဆက်ကလာပြီး သီချင်းဆို၊ အစီအစဉ်တင်ဆက်၊ အွန်လိုင်းမှာ ပစ္စည်းရောင်းရုံမျှနဲ့ သူဌေးလိုသုံးဖြုန်းနေတာတွေဟာလည်း သူတို့ကို ပိုပြီးသံသယဖြစ် စေပါတယ်။

သူတို့လင်မယားကတော့ Forex 3 D နဲ့ ပတ်သက်မှုမရှိကြောင်း ငြင်းဆိုထားပြီး အမှုကို အဆုံးစွန်ရင်ဆိုင်သွားမယ်လို့ ပြောပါတယ်၊  DSI ရဲတပ်ဖွဲ့ကတော့ သူတို့ပိုင် ဆိုင်မှုနဲ့ ဝင်ငွေထွက်ငွေစာရင်းတွေကို အကုန်ပြသဖို့ နောက်အပတ်ထဲ ရက်ချိန်းထား ပါတယ်။

လက်ရှိ ချနယ်လ် ၃ တီဗွီဇာတ်လမ်းတွဲမှာ ပြသနေတဲ့  ဇာတ်လိုက်မင်းသား  ကထင်း ခွန်နလုံးဖန်း ၊ တေးသံရှင် တို ဆဒ်ဆစ်ဝေဆုဖားဖွန်း ၊ တေးသံရှင် ကျာ့အာဆယမ် ၊ တေးသံရှင် ကပုတ် ဖတ်ထရားဖွန်း တို့ရဲ့ နာမည်တွေလည်း အဆိုပါကွန်ရက်ထဲ ပါဝင်လာပါတယ်။ 

ချနယ်လ် ၃ ဇာတ်လိုက်မင်းသား ကထင်းက သူမင်းသားမဖြစ်ခင် ၊ နာမည်မရ ခင်က ငွေအသုံးလိုလို့ ကွန်ရက်ထဲပါဝင်ရင်းနှီးမြှုပ်နှံခဲ့ကြောင်း ၊ နောက်ပိုင်း အမြတ်ငွေမရ တော့လို့ ရင်းနှီးငွေ ဘတ် ၁ သန်း ၂ သိန်းအဆုံးခံပြီး အဖွဲ့နဲ့ မဆက်သွယ်ဖြစ်တော့ဘူးလို့ ရုပ်သံအင်တာဗျူးမှာ ဖြေထားပါတယ် ။  ဒါပေမယ့် Forex 3 D နစ်နာသူများအဖွဲ့ရဲ့ လူမှုကွန်ရက်မှာတော့ သူဟာ နောက်ထပ် ၁၄ ဦးကို အဖွဲ့ဝင်အဖြစ် စည်းရုံးထားတယ်လို့ ဆိုပါတယ်။ 

တေးသံရှင် တိုဆဒ်ဆစ်ကလည်း သူဟာ လောဘနောက်လိုက်မိလို့ ဘတ်ငွေ ၇ သိန်း ဆုံးရှုံးခဲ့ကြောင်း ၊ ဒါပေမဲ့ အလိမ်ခံရတာ လူသိသွားမှာစိုးလို့ ၊ အရှက်ရမှာစိုးလို့ တိုင် တာတောတာတွေမလုပ်ဘဲ ဘဝသင်ခန်းစာအဖြစ်နဲ့သာ ဆိတ်ဆိတ်နေခဲ့တာလို့ သတင်း ထောက်တွေကို ပြောပါတယ်၊ အလိမ်မခံရခင်ကတော့ စကားဝိုင်းတွေမှာ ဒီအကြောင်း ပြောဆိုခဲ့တာရှိပြီး တပါးသူငွေဆုံးရှုံးအောင်တော့ ထပ်ပြီးစည်းရုံးခဲ့တာ မရှိပါဘူးလို့ ဆိုပါတယ်။ 

အထူးစုံစမ်းစစ်ဆေးရေးရဲတပ်ဖွဲ့ DSI က Forex 3 D ကွန်ရက်မှာ Down Line  စာရင်းထဲပါသူနဲ့ Up Line စာရင်းထဲပါသူဆိုပြီး ခွဲခြားသတ်မှတ်ထားပါတယ်။ Up Line စာရင်းမှာ ကိုယ်တိုင်ရင်းနှီးမြှုပ်နှံပြီး တခြားသူကိုလည်း ကွန်ရက်ထဲပါလာအောင် ထပ်ပြီးစည်းရုံးသူတွေဖြစ်ပါတယ်။ သူတို့ဟာ မိမိစည်းရုံးနိုင်တဲ့သူအရေ အတွက်ပေါ်မူ တည်ပြီး ရာခိုင်နှုန်းအလိုက် အခကြေးငွေ ထပ်ရပါတယ်။ Down Line  စာရင်းထဲပါသူကတော့ အစည်းရုံးခံရလို့ ရင်းနှီးငွေဆုံးရှုံး သူတွေဖြစ်ပါတယ်။

Down Line စာရင်းဝင် တေးသံရှင်နဲ့မော်ဒယ် အိုင်းဝမ်နဖိုင်းလင်းကလည်း သူ့အနေနဲ့ အစပိုင်းမှာ သိန်းဂဏန်းထည့်ဝင်ပြီး ၅ လလောက်ထိ အတိုးငွေပုံမှန်ရခဲ့ကြောင်း ၊ ဘတ် ၂ သန်းခွဲ ရင်းနှီးပြီးတဲ့အခါမှာတော့ အမြတ်ငွေမရတော့ဘဲ ကုမွဏီက လှည့်ပတ်လိမ်ညာမှုကို ခံခဲ့ရတာလို့ ပြောပါတယ်။

Forex 3 D ကွန်ရက်ထဲမှာ အနုပညာရှင်တွေ အများအပြားပါဝင်တာဟာ စည်းရုံးသူတွေကိုယ်တိုင်က ယုံကြည်စိတ်ချရတဲ့ နာမည်ကြီး အနုပညာရှင်တွေဖြစ်နေပြီး Forex 3 D က နာမည်ကျော်ကြားသူတွေကို ကောင်းကောင်းကြီးအသုံးချခဲ့တယ်လို့ သူက ပြောပါတယ်။ 

DSI  ရဲတပ်ဖွဲ့ကတော့ ဒီကွန်ရက်မှာ စည်းရုံးသူရော၊ ဆုံးရှုံးသူပါ ပါဝင်ပတ်သက်သူ စုစုပေါင်း ၅၀,၀၀၀ လောက်ရှိပြီး ဒီအထဲမှာ  အနုပညာရှင်အသိုင်းအဝိုင်းက ၁၀၀ ကျော် ပါဝင်ကာ သက်သေတွေစုဆောင်းကာ တဖြည်းဖြည်းဖော်ထုတ်သွားမယ်လို့ ပြောပါတယ်။ 

Forex 3 D ရဲ့ လိမ်လည်မှုပုံမှာ ရင်းနှီးမြှုပ်နှံသူတွေကို အချိုးကျစနစ်နဲ့ အတိုးငွေ ဘဏ်ထဲထည့်ပေးပြီး ရင်းနှီးသူအသစ်ရဲ့ ငွေတွေကို အဖွဲ့ဝင်ဟောင်းရဲ့ အမြတ်ငွေထဲ ထည့်ပေးကာ ငွေသစ်နဲ့ငွေဟောင်း လည်ပတ်နေပြီး များများထည့်ဝင်တဲ့အခါ အတိုးငွေမပေးတော့ဘဲ ပရိုဂရမ်ပြဿနာရှိလို့ဆိုပြီး နေ့ရွှေ့ညရွှေ့ အတိုးငွေတွေ မပေးတော့တာ ဖြစ်ပါတယ်။ တိုင်တန်းမယ်ဆိုရင် ရင်းနှီးငွေတွေ ပြန်မပေးတော့ဘူးလို့လည်း ခြိမ်းခြောက်ထားတယ်လို့ ဆိုပါတယ်။

လောလောဆယ် ပြစ်မှုထင်ရှားလို့ ထောင်ကျနေသူ ၂၀ ကျော်ရှိပြီး ဒီတပတ်ထဲမှာ ၆ ဦး ၊ နောက်တပတ်မှာ နောက်ထပ် ၆ ဦး အမည်တွေ ထွက်လာဖို့ရှိနေပါတယ်။ ဒီစာရင်းထဲ ပါဝင်နိုင်ခြေရှိတဲ့ အနုပညာရှင်တွေရဲ့ အမည်အက္ခရာတွေ အွန်လိုင်းပေါ်ပြန့်နေလို့ အထင်ခံရ သူတွေ လည်း ရှိနေပါတယ်။

DSI တာဝန်ရှိသူကတော့ ကာယကံရှင်ရဲ့ အမည်တွေကို ပြစ်မှုထင်ရှားမှုမရှိသေးဘဲ သိက္ခာကျအောင် ခန့်မှန်းထုတ်ဖော်ပြောကြားခြင်းမပြုဖို့ သတိပေးထားပါတယ်။

ကိုကား- MGR Online/SpringNews/Workpointtoday