တရုတ်နိုင်ငံအနေနဲ့ ယူကရိန်းအကျပ်အတည်းကို အဆုံးသတ်ရာမှာ သူ့ရဲ့ဩဇာသုံးပြီး ကူညီပေးဖို့ သြစတြေးလျ နိုင်ငံခြားရေးဝန်ကြီး Penny Wong က စက်တင်ဘာ ၂၃ ရက် ကုလသမဂ္ဂ အထွေထွေညီလာခံမှာ တောင်းဆိုလိုက်ပါတယ်။ 

“နိုင်ငံတကာ ဖိုရမ်တွေမှာ ဦးဆောင်အခန်းကဏ္ဍက ပါဝင်နေတဲ့ နိုင်ငံတွေနဲ့ ရုရှားအပေါ် လွှမ်းမိုး မှုရှိတဲ့ နိုင်ငံတွေအတွက် ဒီစစ်ပွဲကို အဆုံးသတ်ဖို့ရာ သူတို့ရဲ့ သြဇာကို အသုံးချဖို့ အထူးအရေးကြီး ပါတယ်။ ဒီအခြေအနေမှာ ကမ္ဘာ့အင်အားကြီး နိုင်ငံလဲဖြစ်ပြီး လုံခြုံရေးကောင်စီ အမြဲတမ်းအဖွဲ့ဝင် ဖြစ်တဲ့အပြင် ရုရှားနဲ့လည်း အကန့်အသတ်မရှိတဲ့ မိတ်ဖက်ဖြစ်တဲ့ တရုတ်နိုင်ငံကို ကမ္ဘာကြီးက အာရုံစိုက်နေပါတယ်” လို့ Penny Wong က ညီလာခံမှာ ပြောကြားပါတယ်။

ပြီးခဲ့တဲ့သီတင်းပတ်က ရုရှားသမ္မတ ဗလာဒီမာပူတင်ဟာ ယူကရိန်းအခြေအနေနဲ့ ပတ်သက်ပြီး တရုတ်သမ္မတ Xi Jinping မှာ မေးခွန်းတွေ ပူပန်မှုတွေ ရှိနေတာကို သူနားလည်ကြောင်းနဲ့ ဒါပေမယ့် တရုတ်ခေါင်းဆောင် ပြောခဲ့တဲ့စကားတွေဟာ ပဋိပက္ခအပေါ် "မျှမျှတတ" အနေအထား ဖြစ်တဲ့အတွက် ချီးကျူးကြောင်း ပြောခဲ့ပါတယ်။ 

Penny Wong ဟာ အင်ဒို-ပစိဖိတ် ဒေသရှိ ပဋိပက္ခတိုင်းရဲ့သက်ရောက်မှု အလားအလာကိုလည်း ပြောပါတယ်။ 

ကိုဗစ်-၁၉ ကပ်ရောဂါရဲ့ ဇစ်မြစ်တွေ၊ ကုန်သွယ်ရေးနဲ့ တရုတ်ရဲ့ စွက်ဖက်မှုတွေကို သြစတြေးလျ က စွပ်စွဲထားမှုတွေ အပါအဝင် ကိစ္စများစွာအပေါ် အငြင်းပွားမှုတွေ ဖြစ်ခဲ့ပြီးနောက်မှာ ဩစတြေးလျ နဲ့ တရုတ်ရဲ့ဆက်ဆံရေးက နိမ့်ကျနေပါတယ်။