ယူကရိန်းတောင်ပိုင်း ပင်လယ်နက်ပေါ်က ဆိပ်ကမ်းမြို့ အိုဒက်ဆာမှာ ကာမီကာဇီ ဒရုန်းလို့ လူသိ များတဲ့ အသေခံဒရုန်း တခုကြောင့် အရပ်သားတဦး သေဆုံးခဲ့ကြောင်း စက်တင်ဘာ ၂၃ ရက်မှာ ယူကရိန်းအာဏာပိုင်တွေက ပြောကြားလိုက်ပါတယ်။ 

ပင်လယ်နက်ကနေလာတဲ့ မောင်းသူမဲ့ လေယာဉ် ၂ စင်း က  စီမံရေးရုံးကို ထိမှန်ခဲ့ပြီး တတိယတခုကတော့ အိုဒက်ဆာ ကမ်းလွန်မှာ ပစ်ချခံခဲ့ရတယ်လို့ ယူကရိန်းက ပြောပါတယ်။

ယူကရိန်းတောင်ပိုင်း ကာကွယ်ရေးတပ်ဖွဲ့ရဲ့ ပူးတွဲညှိနှိုင်းရေးစင်တာမှ ထုတ်လွှင့်တဲ့ ဗွီဒီယိုဖိုင်မှာ ဆိပ်ကမ်းဧရိယာရှိ စီမံခန့်ခွဲရေး အဆောက်အအုံဟာ ကြီးကြီးမားမား ပျက်စီးနေပြီး မီးသတ်သမားတွေက ခြံဝင်းအတွင်း မီးငြှိမ်းသတ်နေပြီး အနီးနားရှိ အဆောက်အအုံမှာလည်း ပြတင်းပေါက်တွေ ကွဲကြေနေတာကို ပြထားပါတယ်။

ရိုက်တာအနေနဲ့ ဗွီဒီယိုရဲ့ ရက်စွဲနဲ့ တည်နေရာကို အတည်မပြုနိုင်ပါဘူး။ ရုရှားစစ်တပ် အသုံးပြုတဲ့ အီရန်လုပ် "ကာမီကာဇီ " ဒရုန်းလေးစင်းကို ပစ်ချခဲ့ကြောင်း ယူကရိန်းက စက်တင်ဘာ ၂၃ ရက်မှာ ပြောကြားခဲ့ပြီး တီဟီရန်ဟာ ယူကရိန်းနိုင်ငံသားတွေကို ထိခိုက်အောင် လုပ်နေကြောင်း သမ္မတ ဗိုလိုဒီမီယာ ဇလန်းစကီးက သတိပေး ပြောဆိုလိုက်ပါတယ်။ 

ယူကရိန်းနဲ့ အမေရိကန်တို့က အီရန်က ရုရှားကို ဒရုန်းတွေ ထောက်ပံ့နေတယ်လို့ စွပ်စွဲထားပြီး တီဟီရန်က ငြင်းဆိုထားပါတယ်။ 

အဲဒီဒရုန်းတွေဟာ ရုရှားကို ထောက်လှမ်းရေးအတွက်ရော ဗုံးဖောက်ခွဲရေးအတွက်ပါ အသုံးဝင်ကြောင်း စစ်ဘက်ဆိုင်ရာ ကျွမ်းကျင်သူတွေက ပြောထားပါတယ်။