ယူကရိန်းမှာ ရုရှားရဲ့ စစ်ဆင်ရေးကို အားဖြည့်ဖို့ တစိတ်တပိုင်း စစ်မှုထမ်း အရန်အင်အား ဆင့်ခေါ်မှုအတွင်း လုပ်မိခဲ့တဲ့ အမှားအားလုံးကို ပြန်ပြင်သင့်ကြောင်း စက်တင်ဘာ ၂၉ ရက်က ပြုလုပ်တဲ့ ရုရှားနိုင်ငံ လုံခြုံရေးကောင်စီ အစည်းအဝေးမှာ သမ္မတ ဗလာဒီမာပူတင်က ပြောကြားခဲ့ပါတယ်။

“ဒီစစ်သားစုဆောင်းရေးကာလမှာ ပြဿနာတွေ အများကြီး ပေါ်လာခဲ့ပြီးတော့ ဒီအမှားတွေကို နောင်မဖြစ်ဖို့” ပူတင်က ပြောပါတယ်။

စစ်မှုထမ်းခြင်း ရွှေ့ဆိုင်းခွင့်ရတဲ့ နိုင်ငံသားတွေထဲမှာ ကလေးအများကြီး မွေးထားတဲ့ အဖေတွေ၊ နာတာရှည်ရောဂါသည် အဖေတွေ၊ ဒါမှမဟုတ် အသက်ကြီးနေပြီဖြစ်လို့ စစ်မှုမထမ်းနိုင်တော့တဲ့သူတွေက စစ်မှုထမ်းကင်းလွတ်ဖို့ အရည်အချင်းပြည့်မီကြောင်း ပြောပါတယ်။

ဒီကိစ္စကို သီးခြားစီ စစ်ဆေးဖို့လိုကြောင်းနဲ့ အမှားလုပ်မိရင် ပြန်ပြင်ပြီး ကျိုးကြောင်းမဆီလျော်ဘဲ စစ်မှုထမ်းနေရတဲ့သူတွေကို အိမ်ပြန်ခိုင်းသင့်ကြောင်း သူက ဆိုပါတယ်။

စစ်ရေးအတွေ့အကြုံရှိပြီး လိုအပ်တဲ့ အထူးပြုပညာရှင်တွေကို အရင်ဆုံး ဆင့်ခေါ်သင့်ကြောင်း၊ ဆရာဝန်တွေနဲ့ တခြားနယ်ပယ်က ထိပ်တန်းအတွေ့အကြုံရင့် ပညာရှင်တွေကို ရိုင်ဖယ်တပ်သားလို နေရာမျိုးမှာ ထားမယ့်အစား ဆေးရုံတို့၊ အမှန်တကယ်လိုအပ်မယ့် တခြားနေရာတွေမှာ တာဝန်ပေးသင့်ကြောင်း ပြောပါတယ်။

ပြီးခဲ့တဲ့သီတင်းပတ်က ကြေညာခဲ့တဲ့ စစ်မှုထမ်းခေါ်ယူမှုမှာ အရည်အချင်းမပြည့်မီတဲ့ အမျိုးသားတွေဆီကိုပါ ဆင့်ခေါ်စာတွေ ပေးပို့တာတွေ အပါအဝင် စုဆောင်းရေးအရာရှိတွေ အကြောင်း တိုင်ကြားထားတာတွေ ကျယ်ကျယ်ပြန့်ပြန့် ရှိခဲ့ပါတယ်။

စစ်မှုထမ်းတာကို ရှောင်ရှားနိုင်ဖို့ ထောင်နဲ့ချီတဲ့ အမျိုးသားတွေဟာ ရုရှားနိုင်ငံကနေ ထွက်ပြေးခဲ့ကြပါတယ်။