ပရီးမီးယားလိဂ် တစ်လတာအကောင်းဆုံးဆု နည်းပြတန်ဟတ်ဂ်နှင့် တိုက်စစ်မှူး ရက်ရှ်ဖို့ဒ်တို့ရရှိ
ပရီးမီးယားလိဂ်ကပေးအပ်ချီးမြှင့်တဲ့ စက်တင်ဘာလအတွက် တစ်လတာအကောင်းဆုံးဆုတွေကို မန်ချက်စတာယူနိုက်တက် နည်းပြတန်ဟတ်ဂ်နဲ့ တိုက်စစ်မှူးရက်ရှ်ဖို့ဒ်တို့ရရှိသွားပါတယ်။
မန်ယူအသင်းဟာ နောက်ဆုံး ၄ ပွဲဆက် တိုက်အနိုင်ရခဲ့ပြီး စက်တင်ဘာလအတွင်းကစားခဲ့တဲ့ လက်စတာ၊ အာဆင်နယ်အသင်းတွေနဲ့ ပွဲစဉ်မှာ ၂ ပွဲစလုံးအနိုင်ယူခဲ့တာပါ။
ဒီလိုရလဒ်ကောင်းမွန်မှုတွေကြောင့် နည်းပြတန်ဟတ်ဂ်က စပါးနည်းပြ ကွန်တီ၊ ဘုန်းမောက်ယာယီနည်းပြ ဂယ်ရီအိုနေးလ်တို့ကို ကျော်ဖြတ်ပြီး ဆုရယူနိုင်ခဲ့တာပါ။
တန်ဟတ်ဂ်ဟာ ဆာအဲလက်စ်ဖာဂူဆန်နောက်ပိုင်းမှာ တစ်လတာအကောင်းဆုံးဆုရခဲ့တဲ့ နှစ်ယောက်မြောက် မန်ယူ နည်းပြအဖြစ်လည်း မှတ်တမ်းဝင်ခဲ့ပါတယ်။
တိုက်စစ်မှူး ရက်ရှ်ဖို့ဒ်ဟာလည်း စက်တင်ဘာလအတွင်းကစားခဲ့တဲ့ ၂ ပွဲမှာ ၂ ဂိုးသွင်း၊ ၂ ကြိမ်ဖန်တီးမှုပြုလုပ်ခဲ့တာကြောင့် တလတာအကောင်းဆုံးကစားသမားဆုရရှိခဲ့တာပါ။ မန်ယူအသင်းပရိသတ်တွေကရွေးချယ်တဲ့ တစ်လတာ အကောင်းဆုံးဆုကိုတော့ အဲရစ်ဆင်က ရရှိခဲ့ပါတယ်။
