ရခိုင်ပြည်နယ်၊ ပုဏ္ဏားကျွန်းမြို့နယ်မှာ စစ်ကောင်စီက အောက်တိုဘာ ၂ ရက်ကစလို့  ည ၉ နာရီကနေ မနက် ၅ နာရီအထိ ညမထွက်ရအမိန့် ထုတ်ပြန်ထားပါတယ်။

ပုဏ္ဏားကျွန်းမြို့နယ်အတွင်းရှိ လမ်းမကြီးတွေ၊ အများပြည်သူသွားလာရာလမ်းမကြီးတွေ၊ လမ်းသွယ်၊ လမ်းကြား၊ ဥယျာဥ်နဲ့ အများပြည်သူနဲ့သက်ဆိုင်တဲ့နေရာအားလုံးမှာ ညမထွက်ဖို့  မြို့နယ်အုပ်ချုပ်ရေးမှူး ဦးလှရွှေ လက်မှတ်ရေးထိုးပြီး ထုတ်ပြန်လိုက်တာဖြစ်ပါတယ်။

အကြမ်းဖက်သမားတွေက မိုင်းထောင်ဖောက်ခွဲတာ၊ ချောင်းမြောင်းပစ်ခတ်တာ၊ ရဲစခန်းနဲ့ ရဲကင်းတွေကို ဝင်ရောက်တိုက်ခိုက်တာ၊ အရပ်သား အယောင်ဆောင်ပြီး တိုက်ခိုက်တာကြောင့် ညမထွက်ရ အမိန့်ထုတ်ပြန်တာဆိုပြီး အောက်တိုဘာ ၃ ရက်က စစ်ကောင်စီ အုပ်ချုပ်ရေးတာဝန်ရှိသူတွေက မြို့ပေါ်မှာ လိုက်လံကြေညာနေတယ်လို့ ပုဏ္ဏားကျွန်း ဒေသခံက ပြောပါတယ်။

ပုဏ္ဏားကျွန်းမြို့နယ်မှာ ဘာအကြမ်းဖက်သမားမှ မရှိတဲ့အကြောင်းနဲ့ စစ်ကောင်စီတပ်တွေကသာ ပြည်သူလူထုကို လက်နက်ကြီးတွေနဲ့ ရမ်းကားပစ်ခတ်လို့ စက်တင်ဘာလတလ အတွင်း ရခိုင်ပြည်နယ်အတွင်းက အပြစ်မဲ့  ပြည်သူ ၆ ယောက်သေဆုံးကာ ၂၃ ယောက် ဒဏ်ရာရရှိခဲ့တယ်လို့  ပုဏ္ဏားကျွန်းမြို့ခံတစ်ယောက်က ပြောပါတယ်။  

“ဘယ်သူအကြမ်းဖက်လည်းဆိုတာ တနိုင်ငံလုံးတကမ္ဘာလုံးသိတယ်။ အခုလည်း ညမထွက်ရ အမိန့်ထုတ်ပြန်ပြီး ပြည်သူလူထုကို ဘာတွေဒုက္ခပေးဦးမလဲတော့မသိဘူး။ ကျောက်တော်နဲ့ မြောက်ဦးမြို့နယ်တွေမှာလည်း  စစ်(...)တွေ သောက်စားမူးရူးပြီး လက်နက်ကြီးနဲ့ ညတိုင်းပစ်တယ်။ ကျနော်တို့မြို့မှာတော့ အဲလိုပစ်တာမရှိသေးပေမဲ့  အပြစ်မဲ့ ပြည်သူတွေကို မတရားဖမ်းဆီးတာတွေရှိတယ်။”

ပုဏ္ဏားကျွန်းမြို့မရဲစခန်းက ဒုရဲအုပ်တစ်ယောက်နဲ့ နယ်ထိန်းဒုတပ်ကြပ်တယောက်ကို အောက် တိုဘာလ ၁ ရက်က ရက္ခိုင့်တပ်တော်(အေအေ)က ဖမ်းဆီးသွားတယ်လို့  သိရပါတယ်။

စစ်တွေမြို့နယ်မှာလည်း စစ်ကောင်စီကစက်တင်ဘာလ ၂၄ ရက်ကစလို့  ည ၉ နာရီကနေ မနက် ၅ နာရီအထိ ညမထွက်ရ အမိန့်ထုတ်ပြန်ထားပါတယ်။