ယူကရိန်းတပ်တွေဟာ ကာဆွန်းဒေသတောင်ပိုင်းမှာ နောက်ထပ် နေရာသုံးခုကို သိမ်းပိုက်နိုင်တယ်လို့ သမ္မတ ဇလန်းစကီးက အောက်တိုဘာ ၅ ရက် ညနက်ပိုင်းမိန့်ခွန်းမှာ ပြောပါတယ်။

ကာဆွန်းမြို့အရှေ့ပိုင်းမှာရှိတဲ့ ရွာသုံးရွာရဲ့ နာမည်တွေကို ယူကရိန်းသမ္မတက သူ့မိန့်ခွန်းမှာ ထည့်ပြောသွားပြီး ၂၄ နာရီအတွင်း သိမ်းပိုက်နိုင်တယ်လို့ ပြောပါတယ်။

အဲဒီဒေသထဲမှာ အတုအယောင် လူထုဆန္ဒခံယူပွဲတွေလည်း မရှိတော့ဘဲ အခြေအနေတွေ တည်ငြိမ်အောင် ထိန်းနိုင်တယ်လို့ ပြောပါတယ်။

ရုရှားသမ္မတပူတင်ကတော့ ဗုဒ္ဓဟူးနေ့မှာ ယူကရိန်းနယ်မြေတွေကို ရုရှားနဲ့ ပေါင်းစည်းလိုက်တဲ့ ဥပဒေကို လက်မှတ်ထိုးလိုက်ပါတယ်။

ဥပဒေအသစ်အရ ယူကရိန်းနယ်မြေထဲက ၁၈ ရာခိုင်နှုန်းကို ရုရှားနဲ့ ပေါင်းစည်းလိုက်တာဖြစ်ပြီး ရုရှားတပ်တွေ ယူကရိန်း ရှေ့တန်းစစ်မျက်နှာကနေ ဆုတ်ခွာထွက်ပြေးနေရတဲ့ အချိန်မျိုးမှာ သမ္မတ ပူတင်က သွေးရူးသွေးတမ်း လျှောက်လုပ်နေတာလို့ ယူကရိန်းက ပြောပါတယ်။

သမ္မတ ပူတင်က ဘယ်လိုပဲ လက်မှတ်ထိုးပေမဲ့ အဲဒီနယ်မြေတွေကို ရုရှားတပ်တွေက အပြည့်အဝ ထိန်းချုပ်ထားနိုင်တာ မဟုတ်ဘဲ ယူကရိန်းတပ်တွေရဲ့ တန်ပြန်ထိုးစစ်ကြောင့် ရုရှားတပ်တွေဟာ နဂိုက သိမ်းယူထားတဲ့ နယ်မြေတွေကနေ ပြန်လည်ဆုတ်ခွာ ထွက်ပြေးနေရပါတယ်။