အိန္ဒိယနိုင်ငံ၊ ဟိမဝန္တာတောင်တန်းတွေမှာ နှင်းတွေပြိုကျတာကြောင့် လူ ၁၀ ယောက်ထက်မနည်း သေဆုံးပြီး ၂၀ ကျော် ပျောက်ဆုံးနေတဲ့ တောင်တက်သမားအုပ်စုဆီကို ရောက်ရှိဖို့ ကယ်ဆယ်ရေးသမားတွေ ကြိုးပမ်းနေကြပြီး အောက်တိုဘာ ၅ ရက်မှာ နှင်းတွေကြောင့် နှောင့်နှေးနေရတယ်လို့ ဒေသဆိုင်ရာ ရဲအရာရှိက  ရိုက်တာသတင်းဌာနကို ပြောပါတယ်။

ပင်လယ်ရေမျက်နှာပြင်အထက် ပေ ၁၇,၀၀၀ ဝန်းကျင်လောက်ရှိတဲ့တောင်ပေါ်မှာ ဆီးနှင်းပြိုကျတာဖြစ်ပြီး  အခြေစိုက်စခန်းက ပေ ၁၃,၀၀၀ မှာဖြစ်ကြောင်း၊ လူ ၂၆ ယောက် ပျောက်ဆုံးနေပြီး အလောင်း ၄ လောင်းကို ပြန်လည်ရှာဖွေတွေ့ရှိကြောင်း ဥတ္တရာခန် ရဲတပ်ဖွဲ့ရဲ့ ညွှန်ကြားရေးမှူးချုပ် အာရှော့ခ် ကူးမားက  ပြောပါတယ်။

ဒီနေ့တော့ အလောင်း ၆ လောင်း ထပ်တွေ့ရှိခဲ့ပြီး စုစုပေါင်း သေဆုံးသူ ၁၀ ‌ယောက်အထိ ရှိလာခဲ့ကြောင်းနဲ့ ကယ်ဆယ်ရေးလုပ်ငန်းကို ဆက်တိုက်လုပ်ဆောင်နေကြောင်း သူက ပြောပါတယ်။

သင်တန်းဆရာ ၇ ယောက် လိုက်ပါပြီး သင်တန်းသား ၃၄ ယောက် ပါဝင်တဲ့ တောင်တက်ခရီးသွားလာရေးအဖွဲ့ဟာ အင်္ဂါနေ့မနက် ၈ နာရီ ၄၅ မိနစ်က နှင်းတောင်ပြိုကျမှုအတွင်း ပိတ်မိခဲ့တာပါ။

နှင်းထုပြိုကျချိန်မှာ သူတို့အဖွဲ့ဟာ မီတာ ၅,၆၇၀ အမြင့်ရှိတဲ့ Draupadi ka Danda-II တောင်ထွတ်ကနေ ပြန်ထွက်ခွာလာချိန် ဖြစ်ပါတယ်။

သူတို့ထဲက ၁၄ ယောက်ကို ကယ်ဆယ်နိုင်ခဲ့ပြီး ဆေးကုသမှု ခံယူနေရပါတယ်။ “နှင်းပြိုကျတဲ့နေရာနဲ့ ပိုနီးတဲ့နေရာမှာ ကြိုတင်ဆင်းသက်နိုင်မယ့်နေရာကို ကြိုးစားရှာဖွေနေပါတယ်” လို့ အင်ဒို-တိဘက်နယ်စပ် ရဲတပ်ဖွဲ့ ပြည်သူ့ဆက်ဆံရေးအရာရှိ Vivek Kumar Pandey က ပြောကြားခဲ့ပါတယ်။

ကယ်ဆယ်ရေးလုပ်ငန်းတွေကို ရက်အနည်းငယ်ကြာ ဆက်လက်လုပ်ဆောင်သွားမှာ ဖြစ်ကြောင်းလည်း သူက ပြောပါတယ်။