ထိုင်း-မြန်မာနယ်စပ် ချင်းရိုင်းခရိုင်၊ မယ်ဆိုင်မြို့နယ်ထဲမှာ မနေ့ အောက်တိုဘာ ၁၂ ရက် ညက တရားမဝင် ဝင်ရောက်လာတဲ့ မြန်မာနိုင်ငံသား ၁၃ ယောက်ကို ဖမ်းဆီးရမိတယ်လို့ မယ်ဆိုင်ဒေသတွင်းသတင်းမှာ ဖော်ပြပါတယ်။

အမှတ် ၂ အထူးစစ်ဆင်ရေးတပ်ဖွဲ့ဝင်တွေဟာ ၁၂ ရက် ညပိုင်းက နယ်စပ်လုံခြုံရေး လှည့်လည်စစ်ဆေးစဉ် ည ၁၁ နာရီခွဲလောက်မှာတော့ ဝိန်းဖန်းခမ်းအုပ်စု နယ်မြေ ၆ ဖာမီရွာအနီးမှာ တရားမဝင် ဝင်ရောက်လာတဲ့ မြန်မာအမျိုးသား ၅ ယောက်၊ အမျိုးသမီး ၈ ယောက်၊ စုစုပေါင်း ၁၃ ယောက်ကို ဖမ်းဆီးရမိခဲ့ပြီး လဝကဥပဒေအရ အရေးယူဖို့ မယ်ဆိုင်ရဲစခန်းကို ပို့ဆောင်ထားတယ်လို့ တာဝန်ရှိသူက သတင်းထောက်ကို ပြောပါတယ်။

အဲဒီမတိုင်ခင်တရက် ပြီးခဲ့တဲ့ အောက်တိုဘာ ၁၁ ရက် နေ့ခင်းပိုင်းကလည်း ချင်းရိုင်းခရိုင် ချင်းရိုင်းမြို့ နန်းလဲအုပ်စု ဘန့်ပါရုတ်ကျေးရွာရှိ အဆောက်အဦီဟောင်းဘေးမှာ တရားမဝင် မြန်မာလုပ်သား ၄၉ ယောက်၊ (ကျား ၃၆ ယောက်၊ မ ၁၃ ယောက်)  ဖမ်းဆီးခံခဲ့ရပါသေးတယ်။

မြန်မာပြည်မှာ စစ်အာဏာသိမ်းပြီးတဲ့နောက် နိုင်ငံရေးမတည်ငြိမ်မှု၊ အလုပ်လက်မဲ့ပြဿနာ၊ အသက်အိုးအိမ်လုံခြုံမှု မရှိတာတွေကြောင့် နိုင်ငံသားတွေ အမြောက်အမြား နီးစပ်ရာ အိမ်နီးချင်းနိုင်ငံတွေမှာ ဝင်ရောက်လုပ်ကိုင်ရာက ဖမ်းဆီးခံရတာတွေလည်း နေ့တိုင်းလို ရှိနေပါတယ်။