မကွေးတိုင်း၊ ထီးလင်းမြို့နယ်၊ ရေမျက်နီကျေးရွာက ကထိန်တခုမှာ လုံခြုံရေးယူပေးနေတဲ့ စစ်ကောင်စီရဲဘော် ၂ ယောက်ကို ဒီနေ့ အောက်တိုဘာ ၁၃ ရက် မနက် ၉ နာရီခွဲလောက်က ဝင်ရောက်ပစ်ခတ်ခဲ့တယ်လို့ YDS (ယောလုလင်) အဖွဲ့ခေါင်းဆောင် ဗိုလ်မကျည်းက ပြောပါတယ်။

အခုလိုပြုလုပ်ရတာဟာ ပြီးခဲ့တဲ့ရက်ပိုင်းက YDS အဖွဲ့ရဲ့ အတွင်းရေးမှူး ကိုဖြိုးဝေစိုးကို စစ်ကောင်စီက ပစ်သတ်ခဲ့တာကြောင့် အခုလို ပြန်လည်လက်စားချေရတာလို့လည်း ဆိုပါတယ်။

“ကျနော်ကိုယ်တိုင် သွားပစ်ခတ်တာ။ ပထမက ရေမျက်နီရွာက ကထိန်လုပ်တာကို လုံခြုံရေးယူပေးတယ်ဆိုပြီး ငတ်ကြီးကျ သောက်စားရအောင်လာတဲ့ စစ်(--)နှစ်ကောင်ကို အလစ်ချောင်းပြီး ကျနော်ကိုယ်တိုင် ပစ်ခဲ့တာဗျ။ တယောက်ကတော့ နေရာတင် ပွဲသိမ်းတယ်။ နောက်တယောက်ကတော့ နေ့လယ်ပိုင်းမှာ ဆေးကုရင်း သေတယ်လို့တော့ သိထားရတယ်။ ကျနော်တို့အဖွဲ့ရဲ့ အတွင်းရေးမှူးအတွက် လက်စားချေခဲ့တာ။ အပြန်အလှန်ပစ်တာ မဟုတ်ဘူးဗျ။ ကျနော် အလစ်ဝင်ပစ်ခဲ့တာ။ ပစ်ပြီး ထွက်ပြေးနိုင်ခဲ့တာကြောင့် အထိအခိုက်မရှိခဲ့ဘူး။”

အဆိုပါ ရေမျက်နီကျေးရွာမှာ ၂၀၂၂ မေလ ၁၅ ရက်က စစ်ကောင်စီတပ်နဲ့ ထီးလင်း ပြည်သူ့ကာကွယ်ရေးအဖွဲ့တွေနဲ့ တိုက်ပွဲဖြစ်ပွားခဲ့ပြီး စစ်ကောင်စီတပ်ဘက်က ၁၅ ယောက်လောက် သေဆုံးခဲ့တယ်လို့ ဒေသခံ ပြည်သူ့ကာကွယ်‌ေရးအဖွဲ့ ခေါင်းဆောင်တွေဆီကနေ သိရပါတယ်။

ရေမျက်နီကျေးရွာမှာ စစ်‌ေကာင်စီတပ်ဖွဲ့ဝင်တွေ တိုက်ခိုက်ခံရပြီး သေဆုံးခဲ့တာနဲ့ပတ်သက်လို့ ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်တာ မရှိသေးပါဘူး။

မကွေးတိုင်း၊ မြိုင်မြို့နယ်အနောက်ပိုင်း ကျောက်ခွက်ရေနံမြေ Well 2 မှာ စခန်းချ တပ်စွဲထားတဲ့ စစ်ကောင်စီတပ်ကို အောက်တိုဘာ ၁၂ ရက် ညနေ ၅ နာရီလောက်ကစပီး လက်နက်ကြီး လက်နက်ငယ်တွေနဲ့ ပစ်ခတ်တိုက်ခိုက်ခဲ့တယ်လို့ Black God ပြောက်ကျားတပ်ဖွဲ့ တာဝန်ရှိသူတယောက်က ပြောပါတယ်။

“ကျနော်တို့ဘက်က ပစ်တာက ၁၂၀ မမ၊ ၁၀၀ မမ၊ ၈၀ မမ၊ ၄၀ မမတွေပေါ့။ အော်တိုဂန်းနဲ့ရော ပစ်တယ်။ သူတို့ဘက်က လက်နက်ကြီးတွေ စက်သေနတ်အသေးတွေနဲ့ ပစ်တာ။ ဟိုဘက်က အထိအခိုက်ကို မသိရသေးဘူး။”

ကျောက်ခွက်ရေနံမြေ well 2 မှာ စခန်းချ တပ်စွဲထားတဲ့ စစ်ကောင်စီတပ်သားတွေကို လက်နက်ကြီး၊ လက်နက်ငယ်တွေနဲ့ ပစ်ခတ်ခဲ့တာကြောင့် အပြန်အလှန်ပစ်ခတ်မှု တနာရီနီးပါး ကြာမြင့်ခဲ့တယ်လို့ ဆိုပါတယ်။

ဒီတိုက်ခိုက်မှုကို ယင်းမာပင်ခရိုင်တပ်ရင်း-၁၁၊ တပ်ခွဲ ၃၊ BlackGod ပြောက်ကျားတပ်ဖွဲ့၊ လင်းယုန်ညီနောင် ပြောက်ကျားတပ်ဖွဲ့၊ ဂျိန်းစ်ဘွန်းပြောက်ကျားတပ်ဖွဲ့၊ ဗိုလ်မိုက်ခဲပြောက်ကျားတပ်ဖွဲ့၊ Joker ပြောက်ကျားတပ်ဖွဲ့၊ EagleFighter ပြောက်ကျားတပ်ဖွဲ့၊ LBT ပြောက်ကျားတပ်ဖွဲ့၊ မြိုင်မြို့နယ် ပြည်သူ့ကာကွယ်ရေးတပ်ဖွဲ့တပ်ခွဲတွေ၊ OneSecond ပြောက်ကျားတပ်ဖွဲ့နဲ့ တခြား ဒေသခံ ပြည်သူ့ကာကွယ်ရေးတပ်ဖွဲ့ မဟာမိတ်တပ်ဖွဲ့ ၁၀ ဖွဲ့ကျော် ပူးပေါင်းပြီး စစ်မျက်နှာသုံးခုဖွင့် တိုက်ခိုက်ခဲ့တာဖြစ်တယ်လို့ ထုတ်ပြန်ထားပါတယ်။