ထိုင်းနိုင်ငံမှာ စစ်အစိုးရဆန့်ကျင်ဆန္ဒပြသူတွေကိုအရေးယူဖို့ ရဲစခန်းမှာ သွားရောက်တိုင်ကြားလေ့ရှိတဲ့ ထိုင်းဖွဲ့စည်းပုံအခြေခံဥပဒေကာကွယ်ရေးအဖွဲ့ အတွင်းရေးမှူး နိုင်းဆီဆုဝမ်းကျန်းရယားကို သတင်းစာရှင်းလင်းပွဲအတွင်းမှာ  ရှပ်နီဆန္ဒပြအဖွဲ့ဝင် တယောက်က ဝင်ရောက်ထိုးကြိတ် ကန်ကျောက်ခဲ့ပါတယ်။

ထိုင်းနိုင်ငံက  နာမည်ကြီးလူရွှင်တော် နွတ်ဥဒုမ်းဟာ သူ့ရဲ့တကိုယ်တော်ဖျော်ဖြေပွဲမှာ ဆန္ဒပြသူတွေဘက်က ထောက်ခံတဲ့ စကားလုံး တွေသုံးနှုန်းပြောကြားခဲ့တာကြောင့် နိုင်ငံတော်လုံခြုံရေးကာကွယ်တဲ့အနေနဲ့ သူ့ကိုအရေးယူဖို့  နိုင်းဆီဆုဝမ်းက အောက်တိုဘာ ၁၈ ရက် မနက်က  နည်းပညာဆိုင်ရာရာဇဝတ်မှုနှိမ်နင်းရေးရဲတပ်ဖွဲ့ထံမှာ လာရောက်အမှုဖွင့် တိုင်ကြားခဲ့ပါတယ်။

ဒီကိစ္စနဲ့ပတ်သက်ပြီး နိုင်းဆီဆုဝမ်းက ရဲစခန်းရှေ့မှာ သတင်းစာရှင်းလင်းပွဲလုပ်ပြီးပြောကြားနေ့စဉ် ရှပ်နီအဖွဲ့တယောက်ဖြစ်တဲ့ အသက် ၆၂ နှစ်အရွယ်  နိုင်းဝီရဝစ် ရုန့်ရိန်းဆီရီဖွန်းက သတင်းထောက်တွေကြားထဲကနေ ထွက်လာပြီး  နိုင်းဆီဆုဝမ်းရဲ့ မျက်နှာကိုလက်သီးနဲ့ထိုးတာ၊ ခန္ဓာကိုယ်ကို ကန်ကျောက်ခဲ့ပါတယ်။

ထိုးကြိတ်ခဲ့သူ နိုင်းဝီရဝစ်က “ဒီကနေ့ နိုင်းဆီဆုဝမ်းကို တမင်သက်သက်လာပြီး ထိုးကြိတ်တာဖြစ်တယ်။ နိုင်းဆီဆုဝမ်းအနေနဲ့ တိုင်ကြားသင့်တာတွေ တိုင်ကြားလို့ရပေမဲ့ အမြင်မတူတဲ့သူတွေအပေါ်တော့ မတိုင်ကြားသင့်ဘူး။ ဒီနေ့လာထိုးကြိတ်တာ ကိုယ့်သဘောနဲ့ ကိုယ်ပဲ။ ဘယ်အဖွဲ့ကိုမှ ကိုယ်စားမပြုဘူး။ သူ့ကိုကြည့်မရတာကြာပြီ။ ထိုးကြိတ်ချင်လို့ ပွဲတိုင်းလိုက်ကြည့်နေတာအခွင့်မသာဘူး။ ဒီနေ့မှထိုးခွင့်ရတာ ကျေနပ်တယ်။ တရားဥပဒေအရ ပေးတဲ့အပြစ်ကိုခံယူမယ်။ ရဲစခန်းရှေ့မှာဖြစ်သွားတာကိုတော့ တောင်းပန်ပါတယ်”လို့ သတင်းထောက်တွေကိုပြောပါတယ်။

နိုင်းဆီဆုဝမ်းကတော့ ရဲစခန်းမှာ လူရွှင်တော်ကိုအရေးယူဖို့ တိုင်ကြားစာပေးပို့ခဲ့သလို ကိုယ်ထိ လက်ရောက်ကျူုးလွန်တဲ့ နိုင်းဝီရဝစ်ကိုပါ တရားစွဲဖို့ ပြင်ဆင်နေပါတယ်။ 

တိုင်ကြားစာနဲ့အတူ ပူးတွဲတင်ပြဖို့ အထိုးခံရတဲ့ဒဏ်ရာတွေကို ဆရာဝန်ပြပြီး ဆေးလက်မှတ် ယူဦးမှာဖြစ်ကြောင်း။ သူတို့ပြောတဲ့ ဒီမိုကရေစီက ဒီလိုအကြမ်းဖက်တာလား၊ လာထိုးတဲ့လူနဲ့ ကျနော်ပုဂ္ဂိုလ်ရေးအရ ဘာမှပြဿနာမရှိဘူး၊ သူ့ကိုယ်လည်း မမြင်ဖူးဘူး။ ဒါဟာ နောက်ကွယ်က တစုံတယောက် အဖွဲ့အစည်းတခုခုရဲ့ ပရောဂကြောင့်ဖြစ်မယ်၊ ဒါမှမဟုတ် ဒါကိုအကြောင်းပြုပြီး ဆန္ဒပြသူတွေအတွက် ထောက်ပံ့ငွေအလှူခံတာလည်း ဖြစ်နိုင်တယ်လို့ ပြောသွားပါတယ်။ 

ထိုင်းဥပဒေအရ အခုလို ထိုးကြိတ်ကန်ကျောက်ရင် ကျူးလွန်သူမှာ ထောင်ဒဏ် ၁ လ သို့မဟုတ် ငွေဒဏ် ဘတ် ၁၀,၀၀၀ ဒါမှမဟုတ် ထောင်ဒဏ်ငွေဒဏ် နှစ်ရပ်လုံး ကျခံရမှာဖြစ်ပါတယ်။ 

နိုင်းဆီဆုဝမ်းမှာ အတိုင်အတောထူသူအဖြစ် လူသိများပြီး ခုလိုအထိုးခံရတဲ့အပေါ် ထိုင်းပြည်သူတွေအကြား ဝမ်းသာအားရသူတွေရှိသလို တချို့ကတော့  မယဉ်ကျေးတဲ့ အကြမ်းဖက်လုပ်ရပ်အဖြစ် ရှုတ်ချကြတာလည်းရှိပါတယ်။ 

Ref- Nation TV