မကွေးတိုင်း၊ မြိုင်မြို့နယ်ကို အောက်တိုဘာ ၂၁ ရက် မွန်းလွဲပိုင်းမှာ စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တယ်လို့  ဒေသခံတွေနဲ့ တော်လှန်ရေးတပ်ဖွဲ့တွေဆီကနေ သိရပါတယ်။

မြိုင်မြို့နယ် လင်းကတောရွာနားမှာ ဒီနေ့ အောက်တိုဘာလ ၂၁ ရက်နေ့ မွန်းလွဲ ၂ နာရီလောက်မှာ စစ်ကောင်စီက Mi-35 တိုက်ခိုက်ရေးရဟတ်ယာဥ်တစီးနဲ့ လေကြောင်းကနေ ပစ်ခတ်တိုက်ခိုက်ခဲ့တာလို့ လင်းကတောရွာ ဒေသခံတယောက်က ဒီဗွီဘီကို ပြောပါတယ်။

“အဲဒီရဟတ်ယာဥ်က မုံရွာဘက်ကနေ လာတာဖြစ်ပြီး စက်သေနတ်တွေနဲ့ ပစ်ခတ်သံတွေပါ ကြားရတယ်။ ကျနော်တို့လည်း ကြောက်လို့ လုံခြုံတဲ့နေရာမှာပဲ ပုန်းနေကြရတယ်။”

မြိုင်မြို့နယ် လင်းကတောရွာနားမှာ စစ်ကောင်စီတပ်က လေကြောင်းတိုက်ခိုက်မှု ပြုလုပ်ခဲ့တဲ့အကြောင်းနဲ့ အသေးစိတ်အချက်လက်တွေကိုတော့ နောက်မှပဲ ဖြေကြားနိုင်မယ်လို့  မြိုင် ပ.က.ဖ တပ်ရင်း-၁ တပ်ရင်းမှူး ဗိုလ်လက်ယာက ပြောပါတယ်။

မြိုင်မြို့နယ် တော်လှန်ရေးတပ်ဖွဲ့တခုရဲ့ တာဝန်ရှိသူတယောက်ကလည်း “မြိုင်မြို့နယ်ထဲမှာ စခန်းသိမ်းတိုက်ပွဲ တိုက်ခိုက်ဖို့တော့ရှိတယ်။ အဲဒီနေရာကို စစ်​(...)ဘက်က လေကြောင်းပစ်ကူပေးတာ ဖြစ်နိုင်တယ်။ အချက်အလက် အသေးစိတ်ကိုတော့ သက်ဆိုင်တဲ့ အဖွဲ့အစည်းတွေက ထုတ်ပြန်ပေးပါလိမ့်မယ်” လို့ ပြောပါတယ်။

မြိုင်မြို့နယ်မှာ ပြည်သူ့ကာကွယ်ရေးတပ်ဖွဲ့ PDF စိုးမိုးထိန်းချုပ်နယ်မြေတွေ များပြားလာလို့ စစ်ကောင်စီက အင်အားအလုံးအရင်း အသုံးပြုပြီး ထိုးစစ်ဆင်ကာ ပြန်လည်ထိန်းချုပ်ဖို့ အသဲအသန် ကြိုးစားနေတာဖြစ်ပါတယ်။

ဒါ့အပြင် ကျေးရွာတွေကို မီးရှို့ဖျက်ဆီးတာတွေ၊ ပြည်သူတွေရဲ့ စားနပ်ရိက္ခာတွေနဲ့ အဖိုးတန်ပစ္စည်းတွေကို ခိုးယူတာတွေ၊ အပြစ်မဲ့ပြည်သူတွေကို ဖမ်းဆီးသတ်ဖြတ်တွေကိုလည်း စစ်ကောင်စီတပ်တွေက ကျူးလွန်နေတယ်လို့ ဒေသခံတွေထံက သိရပါတယ်။