စစ်ကိုင်းတိုင်း၊ ဗန်းမောက်မြို့နယ်၊  မံယူးကြီးရွာရှိ တိုက်နယ်ဆေးရုံကို အောက်တိုဘာ ၂၀ ရက် မွန်းလွဲ ၃ နာရီလောက်မှာ စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တယ်လို့ ဒေသတွင်း တော်လှန်ရေးအဖွဲ့ဝင်တယောက်က ပြောပါတယ်။

ဒေသခံရွာသားတွေ ကိုယ်ထူကိုယ်ထဆောက်ထားတဲ့ တထပ်အုပ်ညှပ် တိုက်နယ်ဆေးရုံမှာ ဆေးရုံအမှတ်လက္ခဏာဖြစ်တဲ့ အလံနဲ့ ဆိုင်းဘုတ်တပ်ထားပြီး ဖွင့်လှစ်ဖို့ ပြင်ဆင်နေချိန် လေယာဉ်နဲ့ လာရောက်ဗုံးကြဲတာလို့ သိရပါတယ်။

Indaw Revolution-IR အဖွဲ့ တာဝန်ရှိသူတယောက်က “ရွာသားတွေ လုပ်အားပေးနေချိန် ဗုံးကြဲခံလိုက်ရတာပါ။ ဆေးရုံလည်း ပျက်စီးသွားတယ်။ ရွာထဲမှာလည်း မီးတွေ လိုက်ငြှိမ်းသတ်နေရတယ်။ လူနေအိမ် ၅ လုံးလည်း ပျက်စီးသွားတယ်” လို့ ပြောပါတယ်။

ဗုံးကြဲတိုက်ခိုက်တာကြောင့် ဆေးရုံမှာ လုပ်အားပေးနေတဲ့ အသက် ၄၀ ဝန်းကျင် အမျိုးသမီးတယောက် ထိခိုက်သေဆုံးကာ  ၅ ယောက်ထက်မနည်း ထိခိုက်ဒဏ်ရာရခဲ့တယ်လို့ သိရပါတယ်။

ဒီကိစ္စဟာ စစ်ကောင်စီ လက်အောက်ခံတွေက သတင်းပို့လို့ လေယာဥ်နဲ့ ဗုံးလာကြဲတာလို့  ရွာသူရွာသားတွေက ပြောဆိုကြပါတယ်။

ဒေသတွင်း တော်လှန်ရေးနဲ့နီးစပ်သူတယောက်က “စစ်ဖြစ်ရင်တောင် ဆေးရုံတို့ စာသင်ကျောင်းတို့ဆိုတာ ရှောင်ကြဉ်ရမယ့်နေရာဆိုတော့ အခုလို ကိုယ်ထူကိုယ်ထ လုပ်ထားတဲ့ ဆေးရုံကို လာကြဲတော့ ရွာသားတွေအနေနဲ့ မဖြစ်သင့်တဲ့ကိစ္စဆိုပြီး ဝေဖန်ပြောဆိုနေပါတယ်ဗျ” လို့ ပြောပါတယ်။

ဗန်းမောက်မြို့နယ်အတွင်း စစ်ကောင်စီတပ်ဖွဲ့က မကြာခဏ ဗုံးကြဲတိုက်ခိုက်နေပြီး ဒေသခံတွေ ထိခိုက်သေဆုံးမှုတွေရှိတယ်လို့ ဒေသခံတွေထံက သိရပါတယ်။