မကွေးတိုင်း ပေါက်နဲ့ မြိုင်မြို့နယ်တွေမှာ စစ်ဘေးရှောင်ပြည်သူတွေအတွက် လူသားချင်းစာနာထောက်ထားမှုဆိုင်ရာ အကူညီတွေ လိုအပ်နေပြီး စစ်ကောင်စီစစ်ကြောင်းထိုးလို့ ထွက်ပြေးတိမ်းရှောင်နေရတဲ့အတွက် မြေပဲသီးနှံတွေ ဆုံးရှုံးခဲ့ရတယ်လို့ ဒေသခံတွက ပြောပါတယ်။

ပေါက်မြို့နယ်တောင်ပိုင်းကို အောက်တိုဘာ ၁၁ ရက်နေ့လောက်ကစတင်ကာ စစ်ကောင်စီစစ်ကြောင်း ထိုးနေတာကြောင့် ကျေးရွာ ၇ ရွာလောက်က ဒေသခံပြည်သူတွ် ဘေးလွတ်ရာ ထွက်ပြေးကြရပြီး ချောက်ကြိုမြောင်ကြားထဲမှာ မိုးရွာတဲ့ကြားထဲ အမိုးအကာ အခင်းမရှိဘဲ အိပ်ကြရကာ အစားအစာလည်း မစားရဘူးလို့ သစ်ညီနောင်ကျေးရွာ ဒေသခံအမျိုးသမီးတယောက်က ဒီဗွီဘီကို ပြောပါတယ်။

“သူတို့ စစ်(...)စစ်ကြောင်းလာတယ်လို့ အသံကြားတာနဲ့ သက်ကြီးရွယ်အိုတွေ၊ ကိုယ်ဝန်ဆောင်အမျိုးသမီးတွေ၊ မွေးကင်းစကလေးငယ်တွေနဲ့ စားစရာ၊ သောက်စရာဘာမှ မပါဘဲ ဘေးလွတ်ရာကို ထွက်ပြေးတိမ်းရှောင်ခဲ့ရလို့ အရမ်းကို ဒုက္ခရောက်ကြရတယ်။ စစ်(...)တွေက လမ်းတွေအကုန်လုံးပိတ်ထားတော့ ကျမတို့ ရွာဘက်တွေမှာ နှာစေး၊ ချောင်ဆိုးကအစ ဘာဆေးဝါးမှ ဝယ်လို့မရဘူး။ ဆန် ၁ အိတ်ကိုလည်း ၇၀၀၀၀ ကျပ်လောက် ပေးဝယ်ကြရပြီး စားဝတ်နေရေး တော်တော်ခက်ခဲနေတယ်။ မီးရှို့ဖျက်ဆီးခံရတာများတော့ ခြုံစရာစောင်နဲ့ ဝတ်စရာအဝတ်အစားလည်း မရှိတော့ဘူး။” 

သီးခြောက်ကျေးရွာကိုတော့ စစ်ကောင်စီစစ်ကြောင်းက အောက်တိုဘာ ၁၂ ရက်နေ့ကနေ ၁၄ ရက်နေ့အထိ တအိမ်မှမကျန်အောင် ရွာလုံးကျွတ်မီးရှို့ဖျက်ဆီးသွားကြတယ်လို့ ကျေးရွာနေ စစ်ရှောင်အမျိုးသမီးတဦးက ပြောပါတယ်။

မြိုင်မြို့နယ်ကိုတော့ အောက်တိုဘာ ၂၁ ရက်နေ့က စပြီး စစ်ကောင်စီ စစ်ကြောင်း ၃ ကြောင်းလောက်နဲ့ ဝင်ရောက်လာတာကြောင့် ကျေးရွာ ၅ ရွာလောက်က ပြည်သူတွေ ဘေးလွတ်ရာကို ထွက်ပြေးနေကြရတယ်လို့ ပန်းတိုင်းတောကျေးရွာ ဒေသခံပြည်သူတယောက်က ပြောပါတယ်။

ပြီးခဲ့တဲ့ မေလအတွင်းက မြေပဲစိုက်တဲ့ ရာသီမှာလည်း ဘေးလွတ်ရာ ထွက်ပြေးကြရကာ ဖြစ်သလို စိုက်ပျိုးခဲ့ကြရပြီး အခုမြေပဲနှုတ်တဲ့ အချိန်မှာလည်း စစ်ကြောင်းထိုလာတာကြောင့် ထွက်ပြေးကြရတယ်လို့ ဆိုပါတယ်။

မြေပဲသီးနှံက အခုနှစ်မှာ အထွက်နှုန်းကောင်မွန်ပေမယ့် စစ်ကောင်စီ စစ်ကြောင်းထိုးလာတာကြောင့် ပဲနုတ်ရင်းတန်းလန်းနဲ့ ထွက်​ပြေးခဲ့ရတာကြောင့် ဖော်ပြီးသားမြေပဲတွေ အားလုံးမိုးမိပြီး ပျက်စီးဆုံးရှုံးခဲ့ရတယ်လို့ ပြောပါတယ်။

ပေါက်မြိို့နယ်မှာ လတ်တလောစစ်ဘေးရှောင် ၁၀၀၀၀ ကျော်နဲ့ မြိုင်မြို့နယ်မှာ ၆၀၀၀ ကျော်ရှိပြီး စားနပ်ရိက္ခာ၊ ဆေးဝါး၊ အဝတ်ထည်၊ စောင်၊ ခြင်ထောင်၊ အမိုးအကာနဲ့ ကျန်မာရေးစောင့်ရှောက်မှု အရေးပေါ်အကူအညီ လိုအပ်နေတယ်လို့ သိရပါတယ်။

ပေါက်မြို့နယ်တောင်ပိုင်းမှာတော့ စစ်ကောင်စီစစ်ကြောင်းက အောက်တိုဘာ ၁၃ ရက်နေ့မှာ သီးခြောက်ရွာက အသက် ၇၀ အရွယ်လောက်ရှိတဲ့ အဘိုးအိုတယောက်ကို မီးရှို့သတ်ဖြတ်ခဲံသလို အောက်တိုဘာ ၁၇ ရက်ကလည်း သစ်ညီနောင်ရွာက CDM ကျောင်းဆရာတယောက်ကို ကိုယ်လက်အင်္ဂါတွေကို ဖြတ်တောက်ပြီး ရက်ရက်စက်စက် သတ်ဖြတ်ခဲ့ကြတယ်လို့ သိရပါတယ်။